Боловсролын үнэлгээний төвөөс 2026-2027 оны хичээлийн жилийн Их, дээд сургуульд элсэгчдийн Элсэлтийн ерөнхий шалгалтын хуваарийг албан ёсоор баталлаа. Монгол хэл бичгийн шалгалтдаа тэнцсэн сурагчид мэргэжлийн чиглэлийн дагуу үндсэн шалгалтуудаа өгөх юм. Тодруулбал арванхоёрдугаар анги төгсөгчид зургадугаар сарын 25-наас 28-ны өдрүүдэд Элсэлтийн шалгалтаа өгнө.
Зургадугаар сарын 25-ны өдөр Түүх, Англи хэлний шалгалтаар Элсэлтийн шалгалт эхлэх юм. Дараагийн өдөр буюу 26-ны 10:00-11:40 цагт Хими, 13:00-14:20 цагт Газар зүй, 16:30-17:50 цагт Нийгэм судлалын хичээлийн шалгалт тус тус үргэлжилнэ. Харин 27-ны өдөр 10:00-11:20 цагт Биологи, 14:00-15:30 цагт Математикийн шалгалт явагдахаар төлөвлөгджээ. Шалгалтын сүүлийн өдөр буюу 28-ны 10:00-11:40 цагт Физик, 13:00-14:20 цагт Орос хэл, 16:00-17:20 цагт Монгол хэлний шалгалтыг тус тус авснаар энэ удаагийн ЭЕШ өндөрлөх юм байна.
Боловсролын үнэлгээний төвөөс шалгуулагчдад цаг баримтлахыг анхааруулав. Шалгуулагчид шалгалтын байрандаа нэг цагийн өмнө ирсэн байх ёстой бөгөөд анги, танхимдаа шалгалт эхлэхээс 10 минутын өмнө орж, суудлаа эзэлсэн байх шаардлагатай. Мөн дурдсан хугацаанаас хоцорсон тохиолдолд шалгуулагчийг шалгалтад оруулахгүй болохыг анхааруулав.
Мэдээллийн эх сурвалж: news.mn
Сэтгэгдэл бичих