АНУ-ын Албани хотноо зохион байгуулагдсан чөлөөт бөхийн олон улсын нэр хүндтэй Journeymen Wrestling World Classic тэмцээнд Монголын залуу тамирчид амжилттай оролцож, өндөр амжилт үзүүллээ.
65.8 кг-ын жинд “New Gen Team” клубын тамирчин Б.Ренчинпэлжээ долоон тойрогт дараалан ялалт байгуулж, нэг ч ялагдалгүйгээр аваргын алтан бүсийн эзэн болсон байна. Тэрбээр тэмцээний турш тогтвортой, дайчин барилдаан үзүүлж, өрсөлдөгчдөө илт давуугаар ялснаар ийнхүү түрүүлжээ.
Ингэснээр Монгол Улс тус тэмцээнээс хоёр дахь удаагаа аваргын бүс хүртэж буй бөгөөд өмнө нь мөн “New Gen Team” клубын тамирчин Д.Нарантулга алтан бүс зүүж, шилдэг бөхөөр тодорч байсан амжилтыг бататгалаа.
Энэ удаагийн тэмцээнд Монголын залуучуудын шигшээ багийн дасгалжуулагч Ц.Оюунболд-ын удирдлага дор нийт долоон тамирчин оролцсоноос 72.6 кг-ын жинд “Дархан Эрхэт” клубын тамирчин М.Мөнх-Очир, 102 кг-д Э.Бямбадорж нар мөнгөн медаль хүртэж, 129 кг-ын жинд “Төв Арж” клубын тамирчин Ц.Буянтогтох хүрэл медаль хүртсэн амжилтыг үзүүлжээ.
Тус тэмцээнд есөн орны 480 гаруй тамирчин оролцож, хурд хүч, авхаалж самбаагаа сорин өрсөлдсөн бөгөөд тэмцээний дараагаар тамирчид олон улсын тав хоногийн хамтарсан бэлтгэлд хамрагдахаар төлөвлөсөн байна.
Ийнхүү Монголын залуу бөхчүүд олон улсын дэвжээнд амжилттай барилдаж, ирээдүйн аваргууд тодрон гарч буйг энэхүү тэмцээн дахин нотоллоо.
Сэтгэгдэл бичих