Трамп: Иран улс 48 цагийн дотор Ормузын хоолой-г нээж, хэлэлцээр хийхгүй бол “там бууна” хэмээн анхааруулсан байна.

АНУ-ын Ерөнхийлөгч Дональд Трамп Иранд хандан Ормузын хоолойг нээхийг шаардсан хатуу мэдэгдэл хийж, нөхцөл байдлыг улам хурцатгалаа.

Тэрбээр Иран улс 48 цагийн дотор Ормузын хоолой-г нээж, хэлэлцээр хийхгүй бол “там бууна” хэмээн анхааруулсан байна. Энэхүү мэдэгдлийг Трамп өөрийн олон нийтийн сүлжээнд нийтэлж, өмнө нь өгсөн 10 хоногийн хугацааг ийнхүү богиносгосон нь анхаарал татаж байна.

АНУ-ын зүгээс уг стратегийн чухал усан гарцыг нээх шаардлагыг удаа дараа тавьж байгаа бөгөөд Иран татгалзсан тохиолдолд эрчим хүч, нефтийн дэд бүтцэд цохилт өгөх боломжтойг өмнө нь мөн анхааруулж байжээ.

Харин Ираны тал Трампын энэхүү ультиматумыг няцааж, “бодит бус, дарамт шахалт” хэмээн тодорхойлсон байна. Тегеран Ормузын хоолойд тавьсан хяналтаа сулруулахгүй гэсэн байр сууриа илэрхийлээд байгаа юм.

Дэлхийн газрын тосны нийлүүлэлтийн чухал зангилаа болох Ормузын хоолойн эргэн тойрон дахь хурцадмал байдал ийнхүү нэмэгдэж, АНУ-Ираны зөрчил илүү ноцтой шатанд шилжих эрсдэлтэй байгааг ажиглагчид анхааруулж байна. Мөн сүүлийн өдрүүдэд хоёр талын цэргийн мөргөлдөөн нэмэгдэж, АНУ-ын байлдааны онгоц унасан, нисгэгчийг эрэн хайх ажиллагаа үргэлжилж байгаа зэрэг үйл явдлууд бүс нутгийн нөхцөл байдлыг улам төвөгтэй болгожээ.