АНУ-ын Агаарын цэргийн хүчний A-10 Thunderbolt II дайрагч онгоц Ормузын хоолой орчимд унасан талаар зөрүүтэй мэдээллүүд гарч байна. Ираны талаас уг онгоцыг агаарын довтолгооноос хамгаалах системээр амдан сөнөөсөн гэж мэдэгдсэн бол АНУ болон барууны эх сурвалжууд ослын улмаас сүйрсэн байж болзошгүй гэж мэдээлжээ.
Ираны төрийн өмчит IRIB агентлаг армийн мэдэгдлээс эш татан дамжуулахдаа, “Америкийн A-10 онгоцыг агаарын довтолгооноос хамгаалах систем сөнөөж, Персийн булангийн усанд унагасан” хэмээн мэдээлсэн байна.
Харин The New York Times сонинд АНУ-ын хоёр албан тушаалтныг эш татан бичихдээ, уг онгоц Персийн булангийн бүсэд осолдсон бөгөөд нисгэгчийг аварсан гэж дурджээ. Онгоц сүйрсэн шалтгааныг одоогоор тодорхойлоогүй байна.
Энэхүү үйл явдал нь сүүлийн 24 цагийн дотор Ойрх Дорнодод АНУ байлдааны онгоцоо алдсан хоёр дахь тохиолдол болж байгаа юм. Үүнээс өмнө Ираны Исламын хувьсгалт гвардын корпус Америкийн сөнөөгч онгоцыг мөн сөнөөсөн гэж мэдэгдсэн бөгөөд анх F-35 Lightning II онгоц байсан гэж мэдээлж байв. Гэвч шинжээчид онгоцны сэгийн зургийг судалсны үндсэн дээр F-15E Strike Eagle байсныг тогтоосон байна.
АНУ-ын албаныхан байлдааны онгоцоо алдсаныг баталж, нисгэгчдийг эрэн хайх ажиллагаа үргэлжилж байгааг мэдээлжээ. Америкийн хэвлэлүүдийн мэдээлснээр, багийн хоёр гишүүний нэгийг аварсан бол нөгөө нисгэгчийн хувь заяа одоогоор тодорхойгүй хэвээр байна.
Ийнхүү уг үйл явдлын шалтгаан, нөхцөл байдалд талууд өөр өөр тайлбар өгч байгаа бөгөөд онгоц осолдсон уу, эсвэл довтолгоонд өртсөн үү гэдэг нь одоогоор бүрэн баталгаажаагүй хэвээр байна.
Сэтгэгдэл бичих