Цагдаагийн байгууллагаас сүүлийн хоёр жилийн хугацаанд визийн залилантай холбоотой нийт 235 гэмт хэргийг бүртгэн шалгасан талаар мэдээллээ.
Тодруулбал, энэ оны эхний хоёр сарын байдлаар визийн залилангийн 11 хэрэг бүртгэгдсэн бөгөөд уг төрлийн гэмт хэргийн дийлэнх нь цахим орчинд үйлдэгдэж буйг онцолж байна.
Залилагч этгээдүүд “визийг түргэн шуурхай, хямд үнээр баталгаатай гаргаж өгнө”, “очиход ажлын байр, байрлах байр бэлэн” гэх мэтээр иргэдийн итгэлийг олж, мөнгийг нь залилдаг байна.
Тухайлбал, иргэн Д нь 2018-2020 оны хугацаанд “БНСУ-ын виз гаргаж өгнө” гэх худал зар мэдээллийг цахим орчинд байршуулж, 89 удаагийн үйлдлээр нийт 39 сая төгрөгийн хохирол учруулсан нь мөрдөн шалгах ажиллагаагаар тогтоогджээ.
Улмаар Монгол Улсын шүүхээс Эрүүгийн хуулийн тусгай ангийн 17.3 дугаар зүйлийн 3.1 дэх заалтыг үндэслэн түүнд таван жилийн хорих ял оноосон байна.
Иймд иргэд гадаад улсын виз мэдүүлэхдээ тухайн улсын Элчин сайдын яам, Консулын газар болон албан ёсны виз мэдүүлэх төвөөр дамжуулан үйлчлүүлэхийг цагдаагийн байгууллагаас анхаарууллаа.
Сэтгэгдэл бичих