Хүнс, хөдөө аж ахуй, хөнгөн үйлдвэрийн сайд М.Бадамсүрэн ноолуурын үнийн талаар өмнө нь мэдээлэхдээ “Өнгөрсөн онд ноолуурын үнэ нэг кг нь 185 мянган төгрөгөөс эхэлсэн. Харин энэ хавар 200 мянган төгрөгөөс эхлүүлэх саналыг үндэсний ноолуурын үйлдвэрүүдэд тавьж байна” хэмээн онцолж байв.
Тэрбээр мөн ноолуурыг дотооддоо бүрэн боловсруулах шаардлагатайг дурдаж, түүхий ноолуурын экспортыг хязгаарлан, дотоодын үйлдвэрүүдийг дэмжих бодлого хэрэгжүүлж буйг хэлсэн юм. Үүний хүрээнд ноолуурын үйлдвэрүүдэд хөнгөлөлттэй зээл олгож, малчдаас ноолуурыг илүү өндөр үнээр худалдан авахыг уриалжээ.
Харин энэ хаврын байдлаар Сүхбаатар, Дорнод аймагт ноолуурын үнэ нэг кг нь 180 мянган төгрөгөөс эхэлж байна. Малчдын зүгээс цаашид үнэ өсөж, 200 мянган төгрөгт хүрэх боломжтой гэж үзэж байгаа аж.
Өнгөрсөн онд ноолуурын үнэ 185 мянган төгрөгөөс эхэлсэн ч зах зээлийн нөхцөл байдлаас шалтгаалан 110 мянган төгрөг хүртэл буурч байсан юм.
Иймд энэ жилийн ноолуурын үнийн өсөлт нь дотоодын бодлого, зах зээлийн эрэлт нийлүүлэлтээс шууд хамаарах төлөвтэй байна.
Сэтгэгдэл бичих