Улсын хэмжээнд ой, хээрийн түймрийн нөхцөл байдал хурцдаж, гуравдугаар сарын 23-ны өдөр Сэлэнгэ, Дорнод, Ховд аймгуудад түймрийн дуудлага бүртгэгдэн, холбогдох албаны байгууллагууд шуурхай ажиллаж байна.
Сэлэнгэ аймгийн Хүдэр сумын Тарвагатай багийн “Шоргоолж” гэх газарт гарсан ой, хээрийн түймрийн дуудлагыг 13:20 цагт хүлээн авч, аймгийн Онцгой байдлын газрын Эрэн хайх, аврах салбар болон орон нутгийн мэргэжлийн ангийнхан ажиллажээ. Унтраах ажиллагаанд сумын мод бэлтгэлийн 18 хүн, 3 автомашин, 2 трактортой оролцож, 22:26 цагт түймрийг цурамд оруулсан байна. Одоогоор цэвэрлэгээ хийж, бүрэн унтраахаар ажиллаж байгаа бөгөөд урьдчилсан байдлаар 6 га орчим талбай шатжээ.
Мөн Дорнод аймгийн Баяндун сумын Түргэн 1 дүгээр багийн “Баянгол” гэх газарт гарсан хээрийн түймрийн дуудлагыг 15:00 цагт хүлээн авч, сумын Засаг даргын Тамгын газрын мэргэжлийн анги болон Түргэн багийнхан ажиллаж, тухайн өдрийн 16:20 цагт түймрийг бүрэн унтраасан байна.
Харин Ховд аймгийн Дөргөн сумын Агваш багийн “Дэнж” гэх газарт, “Дөргөн” нуурын арал дээр хулс, зэгс шатаж буй тухай дуудлагыг 17:30 цагт хүлээн авч, аймгийн Онцгой байдлын газрын 48 дугаар анги, Дөргөн, Чандмань сумдын мэргэжлийн анги, цагдаагийн байгууллага болон орон нутгийн иргэд хамтран ажиллаж байна. Түймрийн голомтод нийт 95 хүн, 15 автомашинтайгаар унтраах ажиллагааг үргэлжлүүлж байгаа аж.
Онцгой байдлын байгууллагаас хаврын хуурайшилт нэмэгдэж буй энэ үед ой, хээрийн түймрийн эрсдэл өндөр байгааг анхааруулж, иргэдийг ил задгай гал түлэхгүй байх, тамхи, үнс нурмыг ил хаяхгүй байх, байгальд зорчихдоо галын аюулгүй байдлыг чанд сахихыг уриаллаа.
Сэтгэгдэл бичих