Нэгдсэн Үндэстний Байгууллагын НҮБ-ын Ерөнхий Ассамблей 2011 онд жил бүрийн гуравдугаар сарын 21-ний өдрийг “Дэлхийн дауны өдөр” болгон тунхагласан. Энэхүү өдөр нь дауны хам шинжийн талаарх зөв ойлголтыг нэмэгдүүлэх, тэднийг нийгмийн бүх шатанд тэгш оролцуулах, аз жаргалтай, утга учиртай амьдрах боломжийг бүрдүүлэхэд хүн бүрийн оролцоо чухал болохыг уриалдгаараа онцлог юм.
Дауны хам шинжтэй хүмүүс бусдын адил суралцах, найз нөхөдтэй болох, хөдөлмөр эрхлэх, амьдралынхаа чухал шийдвэрүүдийг гаргах бүрэн боломжтой. Энэ нь тэднийг нийгмийн идэвхтэй, бүтээлч гишүүн байх боломжтойг харуулж байна.
Монгол Улсын хэмжээнд хөгжлийн бэрхшээлтэй 14,609 хүүхэд байгаагаас 0–18 насны 663 хүүхэд дауны синдромтой бөгөөд энэ нь нийт хөгжлийн бэрхшээлтэй хүүхдийн 4.5 хувийг эзэлж байна. Иймд энэ бүлгийн иргэдэд чиглэсэн хууль эрх зүйн орчинг сайжруулах, нийгмийн хамгааллын үйлчилгээний чанар, хүртээмжийг нэмэгдүүлэх шаардлага байсаар байна.
Дауны хам шинж нь 21 дүгээр хромосом гуравласан байдлаар илэрдэг онцлогтой тул гуравдугаар сарын 21-ний өдрийг бэлгэдлийн утгаар сонгон тэмдэглэдэг. Өнөөдөр уг өдрийг дэлхийн 60 гаруй улс орон тэмдэглэн өнгөрүүлж байна.
Дауны хам шинж нь өвчин бус бөгөөд ийм онцлогтой хүмүүс ихэвчлэн найрсаг, дулаан сэтгэлтэй, бусдад эерэг энерги түгээдэг гэдгээрээ онцлог. Тэднийг өөрсдийн сонирхол, чадварт нь тулгуурлан хөгжүүлэхэд амжилт гаргах бүрэн боломжтой байдаг.
Гэсэн хэдий ч гадаад төрх байдлаар нь ялгаварлан гадуурхах, цэрвэх хандлага нийгэмд байсаар байна. Иймд энэ өдрийг тохиолдуулан хүмүүс өөр өөр өнгийн оймс, тод хувцас өмсөж “бид бүгд адилхан” гэсэн санааг илэрхийлдэг уламжлал дэлхий даяар түгээмэл болжээ.
Сэтгэл өнгөгүй ч ертөнцийг гэрэлтүүлэх хүчтэй. Тиймээс ялгаатай байдлыг хүлээн зөвшөөрч, хүн бүрийг тэгш эрхтэйгээр хүндэтгэх нь нийгмийн хөгжилд чухал ач холбогдолтой юм.
Сэтгэгдэл бичих