Цагдаагийн ерөнхий газрын Хэвлэл мэдээлэл, олон нийттэй харилцах хэлтсийн дарга, дэд хурандаа Г.Пүрэвдэлгэр сэтгүүлч нартай холбоотой шалгалтын талаар мэдээлэл хийлээ.
Тэрбээр “Нэгүүн.мн сайтын сэтгүүлч У бусдын хувийн эмзэг мэдээллийг нийтэлнэ хэмээн заналхийлж 50 сая төгрөг авсан, мөн сэтгүүлч Б ижил байдлаар 30 сая төгрөг авсан нь мөрдөн шалгах ажиллагааны явцад тогтоогдсон” гэж мэдэгдэв.
Цагдаагийн байгууллагад иргэн Д-ээс 2026 оны хоёрдугаар сарын 13-нд дээрх гомдол ирүүлсэн бөгөөд шалгалтаар уг үйлдэл нотлогдсон гэж мэдээлэв. Мөн өөр нэг сэтгүүлч ижил бичлэгийг ашиглан мөнгө шаардсан байж болзошгүй нөхцөл илэрсэн байна.
Түүнчлэн иргэн Ж-ээс 2026 оны гуравдугаар сард гаргасан гомдлын дагуу сэтгүүлч Б-д холбогдох хэрэг мөн шалгагдаж байгаа бөгөөд 30 сая төгрөг авсан нь тогтоогдсон гэжээ.
Цагдаагийн байгууллагаас өчигдөр холбогдох сэтгүүлчдээс мэдүүлэг авах ажиллагаа явуулах үед “хэвлэл мэдээллийн эрх чөлөөнд халдлаа” гэх асуудал гарсан талаар дурдсан байна. Мөн энэ ажиллагаа нь өмнө нь цахим орчинд тархсан “төрийн байгууллагад зүй бус үйлдэл гаргасан” гэх бичлэгтэй ямар ч хамааралгүй гэдгийг онцлов.
Шалгалтын үеэр сэтгүүлч Б-ын биеийн байдал муудсан тул яаралтай тусламж дуудаж, улмаар Хоёрдугаар төв эмнэлэгт хүргэж үзүүлсэн байна. Одоогоор түүний эрүүл мэндийн байдалтай холбоотой дүгнэлт гараагүй байна.
Мөн “Нэгүүн.мн” сайтын тоног төхөөрөмжийг хураасан талаар “хэрэгт холбогдох нотлох баримтыг устгах, дамжуулахаас сэргийлэх зорилгоор хураан авсан” гэж тайлбарлав.
Харин “Нэгүүн.мн” сайтын эрхлэгч, сэтгүүлч Л.Баяржаргал дээрх мэдээллийг няцааж, өөр байр суурь илэрхийллээ.
Тэрбээр “Намайг гурван жилийн турш шалгаж, хэлмэгдүүлэх гэж оролдож байна. 30, 50 сая төгрөг авсан зүйл огт болоогүй. UBCab-аар 30 сая төгрөг шилжүүлэхийг оролдсон ч би аваагүй” хэмээн мэдэгдэв.
Мөн “Хэн нэгэн таксигаар мөнгө илгээснийг нотлох баримт болгож, хүнийг хэрэгт холбодог байж болохгүй гэсэн ойлголт нийгэмд төрж байна” гэж байр сууриа илэрхийлсэн юм.
Одоогоор уг хэрэгт холбогдох мөрдөн шалгах ажиллагаа үргэлжилж байгаа бөгөөд албаныхан эцсийн шийдвэр гараагүй гэдгийг онцолж байна.
Сэтгэгдэл бичих