Volkswagen Group дэлхийн зах зээл дэх өрсөлдөөн ширүүсэж, ашиг буурч буйтай холбоотойгоор 2030 он гэхэд Германд 50 мянга орчим ажлын байрыг цомхотгохоор төлөвлөж байна.
Тус компанийн гүйцэтгэх захирал Oliver Blume хувьцаа эзэмшигчдэд илгээсэн захидалдаа “Volkswagen Group 2030 он гэхэд Герман дахь салбаруудаасаа нийт 50 мянга орчим ажлын байрыг цомхотгоно” хэмээн дурдсаныг компанийн жилийн тайланд тусгажээ.
Автомашины үйлдвэрлэлээр Европтоо тэргүүлэгч тус компани жилд 15 тэрбум еврогийн зардал хэмнэх зорилготой бүтцийн өөрчлөлтийн хүрээнд голчлон Volkswagen брэндийн үйлдвэрүүдэд 35 мянган ажлын байрыг цомхотгох асуудлаар 2024 оны сүүлчээр үйлдвэрчний эвлэлүүдтэй тохиролцоонд хүрсэн байна. Мөн гүйцэтгэх захирал О.Блюмийн мэдээлснээр, цомхотголд тансаг зэрэглэлийн Audi, Porsche брэндүүд болон программ хангамжийн Cariad охин компани хамрагдах аж.
Volkswagen компанийн хувьд сүүлийн жилүүдэд Европын зах зээл дэх автомашины эрэлт саарсан, цахилгаан автомашины технологид хийж буй хөрөнгө оруулалт нэмэгдсэн, мөн Хятадын зах зээл дэх борлуулалт буурсан зэрэг хэд хэдэн сорилттой тулгараад байгаа юм. Өмнө нь Хятадын зах зээлд тэргүүлэгчдийн нэг байсан тус компани сүүлийн үед BYD, Geely зэрэг дотоодын үйлдвэрлэгчдэд зах зээлийн байр сууриа алдах болсон байна.
Компанийн татварын дараах ашиг өнгөрсөн онд 44 орчим хувиар буурч, 6.9 тэрбум евро болсон нь 2016 оноос хойших хамгийн сул үзүүлэлт болжээ.
Дэлхийн худалдааны тодорхойгүй байдал, түүхий эд болон эрчим хүчний зах зээлийн тогтворгүй байдлын нөлөөгөөр Volkswagen компани 2026 онд цэвэр ашгийн хэмжээг 4–5.5 хувийн түвшинд байна гэж таамаглаж байна.
Сэтгэгдэл бичих