Өнөөдөр /2026.03.04/ болсон Засгийн газрын ээлжит хуралдаанаар гарсан шийдвэрүүдийг холбогдох сайд нар танилцууллаа. Энэ үеэр Эрчим хүчний дэд сайд С.Далхаасүрэн хэрэглэгчдийн сэргээгдэх эрчим хүчний үүсгүүрээс үйлдвэрлэсэн цахилгааныг түгээх сүлжээнд нийлүүлэх журмыг шинэчлэн баталсан талаар мэдээлэв.
Түүний хэлснээр, Эрчим хүчний сайдын 2026 оны гуравдугаар сарын 2-ны өдрийн 42 дугаар тушаалаар уг журмыг шинэчлэн баталсан байна. Өмнө нь 2020 онд батлагдсан журамд иргэн, аж ахуйн нэгжүүдээс техникийн нөхцөл, тусгай зөвшөөрөл, зураг төсөл шаардах зэргээр олон шат дамжлага байсны улмаас зөвшөөрөл авахад 3-6 сарын хугацаа зарцуулдаг байсан аж. Тиймээс УИХ-ын дарга Н.Учралын дэвшүүлсэн чөлөөллийн санаачилгын хүрээнд журмыг шинэчлэн боловсруулжээ.
Одоогийн байдлаар Монгол Улсад сэргээгдэх эрчим хүч үйлдвэрлэж, түгээх сүлжээнд нийлүүлдэг 111 хэрэглэгч байгаагаас 76 нь айл өрх, 35 нь аж ахуйн нэгж байна.
Шинэчилсэн журмаар хэд хэдэн чухал өөрчлөлт оруулжээ. Тухайлбал:
-
Зөвхөн иргэн, хуулийн этгээдээс гадна СӨХ болон хотхоны зөвлөл, иргэдийн хамтралыг хамруулах
-
Сэргээгдэх эрчим хүч нийлүүлсний төлбөрийг жилд нэг удаа бус сар бүр олгох
-
Хэрэглэгчид олгох төлбөрийг түгээх сүлжээний зардалд тусгах
-
Хүчдэлийн түвшнийг 0.4 кВ-оос 10 кВ болгон нэмэгдүүлэх
-
Тусгай зөвшөөрөлтэй угсралт, суурилуулалтын компаниудын тоог 3-4 дахин нэмэгдүүлэх
-
Бүх зөвшөөрлийн процессыг 3-6 сараас 11–28 ажлын өдөрт багтаан шийдвэрлэх
Мөн өмнө нь тодорхойгүй байсан бүрдүүлэх бичиг баримтыг стандарт маягтаар тодорхой болгосон байна.
Түүнчлэн “Улаанбаатар цахилгаан түгээх сүлжээ” компанийн шугам тоноглолын төлөвлөгөөт засвар үйлчилгээ энэ жилийн хувьд гуравдугаар сарын 3-наас аравдугаар сарын 8 хүртэл үргэлжлэхээр төлөвлөгджээ. Засварын ажлын хүрээнд тодорхой бүсүүдэд цахилгааны түр хязгаарлалт хийх бөгөөд хуваарийг УБЦТС компанийн албан ёсны цахим хуудсаар дамжуулан мэдээлэх аж.
Шинэчилсэн журам нь сэргээгдэх эрчим хүчний хэрэглээг нэмэгдүүлэх, иргэн болон аж ахуйн нэгжүүдийг цахилгаан үйлдвэрлэж сүлжээнд нийлүүлэх боломжийг илүү хялбар болгоход чиглэж байгаа гэж албаныхан үзэж байна.
Сэтгэгдэл бичих