Дэлхийн хамгийн гүн цэнгэг устай нуур болох Байгаль нуурын Ольхон арал дээр 3000 гаруй жуулчин гацаад буйг бүс нутгийн эрх баригчид Лхагва гаригт /2026.02.25/ мэдэгджээ. Гацсан жуулчдын 250 орчим нь гадаадын иргэд гэдгийг Иркутск мужийн захирагч Игорь Кобзев хэллээ. Тэрбээр “Шаардлагатай хүнсний бүтээгдэхүүн, эмийн хангамж сайн байгаа. Жижиглэн худалдааны цэгүүд болон эмийн сантай тохиролцсон байгаа” гэв.
Байгаль нуур нэгдүгээр сараас дөрөвдүгээр сарын хооронд хөлддөг. Энэ үеэр онцгой тунгалаг, зузаан мөстэй Байгаль нуур дэлхийн өнцөг булан бүрээс жуулчид татдаг. Тэр дундаа Ольхон арал руу чиглэсэн мөсөн замууд хоёрдугаар сараас гуравдугаар сарын хооронд ачаалал ихтэй болдог.
Гэсэн хэдий ч арал руу хөтөлдөг замын дагуух мөсний ихэнх хэсэг нь тээврийн хэрэгслийг аюулгүй байлгахад хангалттай зузаан биш байгааг Иркутск мужийн захирагч Игорь Кобзев хэлэв. Өнгөрсөн долоо хоногт Хятадын долоон жуулчин, нэг орос эр фургон нь мөс рүү цөмөрч, живж нас баржээ. Иймд албан ёсны мөсөн зам нээгдэх хүртэл мөсөн дээр машин жолоодохыг хатуу хориглож байна.
Жуулчдыг арал дээр анх очиход нэг бол мөс зузаан байсан, нэг бол тэд өөр тээврийн хэрэгслээр очсон байх магадлалтай.
Мөсөн замыг ойрын гурав хоногтоо багтаан нээхээр зорьж байна. Мөн эх газар руу зорчигч тээвэрлэ ажлыг зургаан онгоцоор гүйцэтгэж байна. Мөсний гарц нээгдэх хүртэл зайлшгүй шаардлагатай бараа бүтээгдэхүүнийг мөн онгоцоор хүргэх болно.
Сэтгэгдэл бичих