Италийн нийслэл Rome хотын нэгэн эртний сүмд хийгдэж буй сэргээн засварлалтын ажлын үеэр ханын уран зурагт хожим нэмэлт өөрчлөлт орсон байж болзошгүйг илтгэх сонирхолтой баримт илэрсэн талаар урлаг судлаачид мэдээллээ. Олон зуун жилийн настай фреск зургуудыг цэвэрлэн сэргээх явцад анхны дүрслэлийн зарим хэсгийг дараа үеийн уран бүтээлчид өөрчилсөн шинж тэмдэг илэрсэн нь мэргэжилтнүүдийн анхаарлыг татсан байна.
Судлаачдын тайлбарласнаар будгийн давхаргын дор өөр өнгө, өөр хэлбэрийн дүрслэл байгааг тусгай гэрэл болон рентген шинжилгээгээр тогтоожээ. Энэ нь тухайн бүтээлийг бүтээсэн анхны зураачийн санааг дараагийн зуунд өөрчилсөн, эсвэл тухайн үеийн шашин, нийгмийн үзэл баримтлалтай нийцүүлэх зорилгоор засварласан байж болзошгүйг харуулж байна.
Италид сүм хийдийн ханын зургууд нь зөвхөн урлагийн төдийгүй түүх, шашин соёлын үнэт өвд тооцогддог. Иймээс сэргээн засварлалтын ажил бүр нь шинжлэх ухааны нарийн аргачлал, олон улсын урлагийн стандартыг баримтлан хийгддэг бөгөөд нэгэн жижиг өөрчлөлт ч тухайн бүтээлийн гарал үүсэл, үеийн онцлогийг шинээр тодорхойлох ач холбогдолтойд тооцогддог байна.
Энэхүү нээлт нь Европын уран зургийн түүхэнд хамаарах шинэ судалгааны эхлэл болж магадгүй хэмээн мэргэжилтнүүд үзэж байгаа бөгөөд тухайн бүтээлийн анхны төрхийг илүү тодорхойлох судалгаа үргэлжилж байна. Урлагийн ертөнцөд ийнхүү олон зууныг дамнан хадгалагдсан бүтээлүүдээс шинэ баримт илрэх нь түүхийн нууцыг дахин сөхөх чухал үйл явдалд тооцогддог юм.
эх сурвалж: financial news
Сэтгэгдэл бичих