Хонконгийн ардчиллыг дэмжигч, хэвлэл мэдээллийн салбарын нэр нөлөө бүхий бизнесмэн Жимми Лай-г Үндэсний аюулгүй байдлын хуулийг зөрчсөн хэрэгт буруутай гэж шүүх шийдвэрлэсэн нь олон улсын анхаарлын төвд орлоо. Түүнийг гадаадын хүчинтэй хуйвалдсан, төрийн эсрэг үйл ажиллагаа явуулсан гэх үндэслэлээр ялласан бөгөөд энэхүү шийдвэр нь Хонконг дахь хэвлэлийн эрх чөлөө, үг хэлэх эрхийн ирээдүйд ноцтой нөлөө үзүүлж болзошгүй хэмээн хүний эрхийн байгууллагууд анхааруулж байна.
Жимми Лай нь Хонконгийн алдарт Apple Daily сониныг үүсгэн байгуулж, Бээжингийн бодлогыг шүүмжилдэг цөөн хэвлэл мэдээллийн хэрэгслийн нэгийг удирдаж байсан юм. Тус сонин 2021 онд хаагдсан нь Үндэсний аюулгүй байдлын хуулийн хүрээнд хэвлэл мэдээлэлд тавигдсан хязгаарлалтын тод жишээ хэмээн олон улсын хэвлэлүүд дүгнэж байв.
Шүүхийн шийдвэр гарсны дараа АНУ, Их Британи, Европын холбоо болон олон улсын хүний эрхийн байгууллагууд уг хэргийг “улс төрийн шинжтэй”, “шүүхийн хараат бус байдалд сөргөөр нөлөөлсөн” хэмээн шүүмжилж, Хонконг дахь хүний эрх, хэвлэлийн эрх чөлөө доройтож байгаад гүнээ санаа зовниж байгаагаа илэрхийлсэн байна.
Харин Хятадын эрх баригчид Жимми Лайг ялласан нь “хууль ёсны, дотоодын асуудал” хэмээн мэдэгдэж, Үндэсний аюулгүй байдлын хууль нь Хонконгийн тогтвортой байдал, аюулгүй байдлыг хангах зорилготой гэж тайлбарлажээ. Тэдний зүгээс уг хуулийг улс төрийн дарамтын хэрэгсэл болгон ашиглаж байна гэсэн олон улсын шүүмжлэлийг эрс няцааж байна.
Шинжээчдийн үзэж буйгаар, Жимми Лайн хэрэг нь Хонконг дахь “нэг улс, хоёр тогтолцоо” зарчмын хэрэгжилт сулран, Бээжингийн хяналт улам чангарч байгаагийн илрэл юм. Мөн энэ нь тус бүс нутагт хэвлэл мэдээллийн байгууллагууд өөрсдийгөө цензурдэх, гадаадын хөрөнгө оруулагчид болгоомжтой хандах шалтгаан болж болзошгүйг онцолж байна.
Эх сурвалж: The Guardian
Сэтгэгдэл бичих