Гэр бүл, хөдөлмөр, нийгмийн хамгааллын яам Нийгмийн халамжийн тухай хуулийн шинэчилсэн найруулгын төсөл болон дагаж өргөн мэдүүлэх хуулийн төслүүдийг “Монфемнет Үндэсний Сүлжээ” ТББ-тай хамтран Иргэний нийгмийн байгууллагуудын төлөөлөл 30 гаруй байгууллагын тэргүүн, удирдах зөвлөлийн гишүүдэд танилцуулах уулзалтыг зохион байгууллаа.
ГБХНХЯ-ны Төрийн нарийн бичгийн дарга Л.Мөнхзул уулзалтыг нээж, хэлсэн үгэндээ, “Хуулийн шинэчилсэн найруулгын төслийг хүүхэд, гэр бүлд чиглэсэн үйлчилгээг нийгмийн халамжийн бодлогоос салгах, нийгмийн халамжийн арга хэмжээг хөдөлмөр эрхлэлттэй уялдуулах замаар өрх, иргэдийг ядуурлаас гаргах, хүн амын ядуу, эмзэг байдалд өртсөн зорилтот өрх, иргэний амьжиргааг дэмжих, бие даан амьдрахад дэмжлэг үзүүлэхэд чиглэсэн үйлчилгээнүүдийг нэмэгдүүлэх бодлогыг баримтлан боловсруулсан” болохыг онцлон дурьдлаа.
Иргэний нийгмийн байгууллагуудын зүгээс ахмад настан, хөгжлийн бэрхшээлтэй иргэн, амьжиргаа багатай, хүчирхийлэлд өртсөн зэрэг зорилтот өрх, иргэний онцлог хэрэгцээнд нийцсэн үйлчилгээнүүдийг нэмэгдүүлэх, илүү тодорхой болгон тусгах, зөвхөн орлогоор биш боломжийг бий болгоход анхаарах, амьжиргаа багатай өрхийн хүүхдэд боловсролын дэмжлэг үзүүлэх зэрэг санал дэвшүүллээ.
Сэтгэгдэл бичих