УДБЭТ-ын уран бүтээлийн 63 дахь улирлын хөтөлбөр зарлагдаж, тасалбарын борлуулалт 2025 оны 08 дугаар сарын 01-нээс эхэлж байна. Тоглолтын улирлын нээлт жил бүрийн 10 дугаар сард болдог уламжлалтай ч энэ удаагийн 63 дахь улирлыг 2025 оны 09 дүгээр сарын 27, 28-нд УДБЭТ-ын хөгжмийн уран бүтээлчдийн ‘Orchestra Night-III’ тоглолтоор нээх гэж байна.
Түүнчлэн Дуурийн нээлтээ Монголын түүхэн дуурь Төрийн шагналт хөгжмийн зохиолч Ц. Нацагдоржийн цомнол ‘Гүн Гэрийн гүнж’ дууриар, Балетын нээлтээ 10 дугаар сарын 10,11,12-ны өдөр П.И.Чайковскийн ‘Хунт нуур’ балетаар тус тус хийхээр төлөвлөөд байна. Улирлын нээлтийн ‘Orchestra Night-III’ тоглолтын 09 дүгээр сарын 27-ны тоглолтод УДБЭТ-ын хөгжимчид дангаар Францын хөгжмийн бүтээлүүдийг эгшиглүүлэх бол 28-ны өдрийн тоглолтод Итали улсаас уригдан ирж буй уран бүтээлчид болох хийлч, төгөлдөр хуурч нар хамтран Монгол, Италийн хөгжмийн бүтээлүүдээс тоглоно.
Тоглолтын 63 дахь улирлын туршид тайзнаа 5-н дуурь тоглогдох ба Монголын хөгжмийн урлагт, тэр дундаа дуурийн хөгжилд үнэтэй хувь нэмэр оруулсан хөгжмийн зохиолч, Төрийн шагналт Ц.Нацагдоржийн 75 насны ойг тохиолдуулан улирлын нээлтэд түүний ‘Гүн Гэрийн гүнж’ дуурийг сонгон үзэгчдэдээ толилуулж буй. Мөн тоглолтын улирлын хугацаанд үндэсний хоёр дуурь тоглохоор бэлтгэж байгаагийн нэг нь Хөдөлмөрийн баатар, Төрийн шагналт Б.Шаравын ‘Чингис хаан’ дуурь юм.
Уран бүтээлийн 63 дахь улирлын үеэр гадны нэр хүнд бүхий уран бүтээлчидтэй хамтран Монголын үзэгчдэд зориулан УДБЭТ-ын тайзнаа тоглолтууд зохион байгуулна. Тэдгээрийн нэг нь 2025 оны 09 дүгээр сарын 19-нд тоглогдох Хиблы Герзмавын олон улсын дуурь дуулаач ба концертмэйстрүүдийн уралдааны шагналт байруудын дуучдын Гала концерт юм. Тус концертод Монгол, ОХУ, Армен, Казахстан зэрэг орны 7 дуучин, нэг удирдаач ДБЭТ-ын оркестр найрал хөгжимтэй хамтран Оросын хөгжмийн зохиолчдын ари, романс, дэлхийн сонгодог бүтээлээс тоглоно. УДБЭТ-ын уран бүтээлийн 63 дахь улирлын нэг онцлог нь П.И.Чайковскийн ‘Хунт нуур’ бүжгэн жүжгийг Монголын тайзнаа тавьсны 50 жилийн ой тохиож байгаа бөгөөд тус улирлын хугацаанд “Хунт нуур” балет мөн П.И. Чайковскийн ‘Цөмөөхэй’, А.Аданы ‘Жизель’ балетыг тус тус тоглоно. УДБЭТ нь 63 дахь улирлын эхний 4 сарын тоглолтоо анх удаа 2025 оны 08-р сарын 01-ны өдрөөс эхлэн нээж, үзэгчдэдээ хөнгөлөлттэй тасалбарын багцыг урьдчилан худалдан авах боломжийг нээж байна.
Театрын 9,10,11,12 дугаар сарын тоглолтууд 2025 оны 08-р сарын 01-ны өдрөөс эхлэн www.Ticket.mn, Театрын кассаар зарагдаж эхлэх юм. Хэрэв та бүхэн 08 дугаар сардаа багтаан тоглолтуудаа сонгон худалдан авалт хийвэл, хөнгөлөлттэй үнээр авах боломжийг өгч байгаагаа дуулгахад таатай байна гэж хэвлэлийн бага хурлын үеэрээ мэдээллээ.
Сэтгэгдэл бичих