Эдийн засгийн хүндрэлээс үүдэж 2022 оны төсөвт тодотгол хийж байгаагийн зэрэгцээ Төрийн хэмнэлтийн хуулийг УИХ-аар хэлэлцэж буй энэ үед Соёлын сайд Ч.Номин гадаад орноор зугаалж явна. Өнгөрөгч амралтын өдрүүдэд Бүгд Найрамдах Итали улсад зохион байгуулагддаг Венецийн дүрслэх урлагийн олон улсын биеннальд оролцсон.
Үргэлжлүүлээд тэрбээр 20 гаруй хүмүүсийн хамтаар ирэх сарын 17-28-ны хооронд болох Каннын олон улсын кино наадамд оролцоно. Каннын кино наадамд оролцох уран бүтээлчдийн Англи хэлний ярианы чадварыг сайжруулах хичээл хүртэл багшаас авч мөнгө үрж байгаа.
Мэдээж олон улсын нэр хүндтэй наадамд оролцон улс орноо сурталчилж, соёлын зах зээлээ өргөтгөх болно. Гэхдээ улсын эдийн засаг хүнд үед дээрх наадмаас өнжиж тэвчиж болох зардал мөн үү гэвэл мөн. Каннын наадам бол Оскартай харьцуулахад маш өндөр зардалтай тансаг зэрэглэлийн наадам. Францын зүүн өмнөд эрэгт байрладаг Канн энгийн үед ч асар үнэтэй хот, товчхондоо баячуудын амьдардаг, аялал жуулчлалын газар. Ялангуяа кино наадмын үеэр бүр илүү үнэд хүрч, энгийн буудал нь ч олддоггүй гэдэг.
Нөгөөтэйгүүр цаг үеийн нөхцөл байдалтайгаа уялдаад гадаад валютын албан нөөц тодорхой хэмжээгээр буурсан. Ийм байтал Каннын наадамд Соёлын сайдын хамтаар 20-уулаа оролцох гэж байгаа нь валютаа салхинд хийсгэхтэй адил. Зардал өндөртэй уг наадамд кино бүтээгч маш баян студиуд эсвэл нэр дэвшиж буй кинонуудын уран бүтээлчид л оролцдог.
Ирж, очих онгоцны зардал, байрлах буудал, хоол унд мөн наадмын үеэр талбай түрээслэх төлбөр гээд тус бүр өндөр зардал орох нь тодорхой. Энгийн зурагчид гэхэд л цагийн 600 еврогоор смокинг түрээсэлж ордог.
ЭХ СУРВАЛЖ: zarig.mn
Сэтгэгдэл бичих