“Ремо медиа” компанийг үүсгэн байгуулагч Б.Намнандорж цахим орчинд хэрхэн биеэ “зөв боловсон” авч явах талаар зөвлөсөн нь сонирхолтой, мэдүүштэй байв.
Тэрээр Шангри Ла зочид буудалд болсон Гадаадад төгсөгчдийн анхдугаар уулзалтад илтгэл тавьсан юм.
Манай иргэдийн хэвлэл мэдээллийн боловсрол өндөр биш тул хуурамч мэдээнд шууд итгэдэг, мэдээг нягталдаггүй, шүүн тунгаадаггүй. Иймд цахим орчинд хуурамч мэдээг бусдад түгээх нь элбэг байна.
Жишээ нь хятад үсний боолт хуурстай, фэйсбүүк хаагдах гэж байна гэх мэт хуурамч мэдээллийг цахим орчинд түгээсээр л байна. Гэвч хүн мэдээлэлд үндэслэн шийдвэр гаргадаг. Хуурамч мэдээлэл үнэн мэдээллээс 6 дахин хурдан түгээлттэй байдаг аж. Иргэдийн хэвлэл мэдээллийн боловсрол дутмаг байгаа нь цахим орчинд судалгаа, баримтаас илүүтэй үзэл бодол давамгайлж байдагтай холбоотой гэж Б.Намнандорж дүгнэсэн юм. Иймд эрдэмтэд, судлаачдын судалгаа бүтээлийг бусдад илүү түгээх нь хуурамч мэдээллийг сөрөх, зогсоох зөв арга болно.
Хуурамч мэдээллийг яагаад түгээдэг вэ?
Нуугдмал зорилготой байдаг. Хандалт авах, ашиг орлого олох, таны хувийн мэдээлийг цуглуулах байж болно. Мөн олон нийтийн үзэл бодлыг гуйвуулах, нэг асуудалд олон нийтийн анхаарлыг татах, ухуулга хийх зорилго агуулсан байдаг аж.
Хуурамч мэдээллийг ялган таних аргууд:
Та мэдэээлэл түгээхдээ хариуцлагатай байх хэрэгтэй. Тухайн мэдээллийн эх сурвалжаа сайтар шалга. Сэтгэл хөдлөлдөө бүү авт. Зөвхөн гарчиг уншаад түгээх (share) буруу. Мэдээний огноог анхаар.
Та уншиж байгаа мэдээ, нийтлэлдээ стандарт тогтоо. Шударга байна уу, сэтгүүлч бүх талд үгээ хэлэх боломжийг тэгш олгосон уу, аль сайтад нийтлэв , хэн гэдэг сэтгүүлч бичсэн бэ, баримтаа баталгаажуулан нотолсон уу? Эх срвалжаа дурдсан уу гэдгийг анхаар.
Танихгүй хүнтэй бүү найз бол.
Үл мэдэх группуудад бүү нэгд.
Сэтгэгдэл бичих