“ӨРХ БҮР ХАШААНДАА МОД ТАРЬЯ” АЯНЫ НЭЭЛТ БОЛЛОО
Бүх нийтийн мод тарих арга хэмжээний хүрээнд “Өрх бүр хашаандаа мод тарья” аяны нээлтийн үйл ажиллагааг Сонгинохайрхан дүүргээс өнөөдөр эхлүүллээ. Нээлтийн үйл ажиллагаа 34-р хорооны Биеийн тамир спортын хорооны гадна талбайд болж БОАЖЯ-ны сайд Н.Уртнасан, УИХ-ын гишүүн Б.Жаргалмаа болон бусад албаны хүмүүсийн хамт оролцлоо.
Сонгинохайрхан дүүргийн хувьд энэ жилийг ногоон дүүрэг болгох зорилтот жилийг зарласан. Үүнтэй холбогдуулан байгаль дэлхийгээ нөхөн сэргээх, агаарын бохирдол, хуурайшилт, цөлжилтийн эсрэг бодит үйлдэл хийж, амьдарч буй хороо, дүүргээ ногоон болгохын төлөө хамтдаа хичээхийг уриалж байна. Өнөөдөр 1, 2, 3, 4, 5, 6, 20, 22, 24, 26, 32, 33, 34, 35, 36, 41 дугаар хороодод тус бүрт 250 ширхэг суулгац буюу нийт 4400 гаруй суулгацыг хүлээлгэн өглөө.Мөн Нээлтийн өдөрлөгийн дараа 34-р хорооны хоёр өрхийн хашаанд суулгацуудын дээжийг задлан, хөрс бэлтгэн шар хуайс, монос, буйлс зэрэг модыг тарилаа.
АГААР, ХӨРСНИЙ БОХИРДЛООС СЭРГИЙЛЖ АМЬДРАХ ОРЧНОО ТАВ ТУХТАЙ БОЛГОХЫН ТӨЛӨӨ БҮХ НИЙТЭЭРЭЭ МОД ТАРИХЫГ УРИАЛЖ БАЙНА.
Сэтгэгдэл бичих