Хот хоорондын нийтийн тээвэр өнөөдөр /2021.03.03/-өөс үйлчилгээнд гарч эхэллээ. Орон нутагт зорчиж буй иргэд 72 цагийн дотор PCR шинжилгээ өгсөн байх ёстой бөгөөд УОК-ын мэдээлснээр шинжилгээний хариу гарсан цагаас эхлэн 72 цагийг хүчинтэйд тооцох юм.
Ингэснээр орон нутагт зорчих билет цахимаар захиалах эрх нь үүснэ гэдгийг Авто тээврийн үндэсний төвөөс мэдээлэв.
Тус төвийн Зорчигч тээврийн тасгийн дарга Б.Дуламсүрэн ‘PCR шинжилгээний хариу нь гарсан иргэн Автотээврийн үндэсний төвийн хаягаар тасалбараа захиална. Хот хоорондын нийтийн тээврийн үйлчилгээ өндөржүүлсэн бэлэн байдлын үед ажиллаж байгаа ч тасалбарын үнэд өөрчлөлт байхгүй. Үнэ 35 мянган төгрөг. Бид тусгай үүргийн тээвэрлэлтийн үетэй адил нэг автобусанд 40 зорчигч тээвэрлэнэ. Урд эгнээг жолоочийг тусгаарлах байдлаар бэлдсэн.Өөрөөр хэлбэл, 45 хүний суудалтай автобус 40 хүний дүүргэлттэй зорчино. Иргэдэд анхааруулахад PCR шинжилгээний хариу гарсны дараа билетээ захиалах хэрэгтэй. Хариу гараагүй байхад тасалбар захиалах боломжгүй’ гэлээ.
Нийслэлээс гарч буй иргэд нийтийн тээврээр зорчиж буй тохиолдолд зам дунд буудаллахгүй. Орон нутагтаа очсоны дараа гэрээр долоо хоног ажиглалтад байх юм. УОК-ын мэдээлснээр нийслэлээс гарч буй гэр бүлийн гишүүдийн нэг нь PCR шинжилгээ өгсөн бол бусад гишүүдээс нь шинжилгээний бичиг шаардахгүй юм. Харин орон нутагт цахимаар болон киоск машинаар тасалбар захиалах боломжгүй иргэд касст билет захиалах боломжтой.
Сэтгэгдэл бичих