Хөшигийн хөндийн нисэх онгоцны буудал барих төсөл 2006 оноос яригдаж, 2013 онд ажил эхэлсэн ч өдгөө хүртэл ашиглалтад орохгүй хүлээгдэж байгаа. Ийнхүү урт хугацаанд хэрэгжиж байгаа тус төсөл нь дарга нарын мөнгө угаах нэг хэрэгсэл болсныг илтгэх баримтууд эхнээсээ олон нийтэд ил болсныг бид цувралаар сурвалжлан хүргэж буй.
723 сая төгрөгөөр “Land criuser 200” маркийн тусгай тоноглолтой штаб командын автомашин худалдаж авсан тухай Үндэсний аудитын газраас мэдээлсэн. Бүр цаашилбал, баримт дээр тус машиныг 1 тэрбум 3 сая 787 мянга 660 төгрөгөөр ИНЕГ-т хүлээлгэн өгсөн байдаг.
Энэ булхиа олны нүдийг орой дээр гаргаж дуусаагүй байтал үнэтэй машин худалдаж авсан дахин нэг баримт ил боллоо. Тодруулбал, Хөшигийн хөндийн нисэх буудал барих төслийн хүрээнд тусгай тоноглолтой эмнэлэгийн түргэн тусламжийн “Mercedes benz” маркийн автомашиныг 1 тэрбум 377 сая 312 мянга 10 төгрөг буюу 1.4 орчим тэрбум төгрөгөөр худалдаж авчээ. 2016 оны Mercedes benz загвар нь 126 саяас 178 сая төгрөгийн хооронд Монгол Улсад зарагдаж байсан гэж тооцохоор зах зээлийн үнээс 7-10 дахин нугалсан өндөр үнээр тэр машиныг худалдан авч, ИРГЭНИЙ НИСЭХИЙН ЕРӨНХИЙ ГАЗАРТ 28-01 УБУ улсын дугаартайгаар хүлээлгэн өгсөн байх юм.
Энэ мэт тусгай тоноглолтой гэх автомашинууд дээр гарсан зөрчлийг арилгах, хариуцлага тооцох Үндэсний аудитын газрын 2020.03.25-ны өдрийн шаардлага ИНЕГ-т очсон байдаг ч нүглийн нүдийг гурилаар хуурна гэгчээр “Үр дүнгийн урамшуулалт цалинг хасаж, албан тушаал бууруулах хүртэл арга хэмжээ авсан” гэх боловч нэр холбогдсон дарга нар нь өнөөдөр ажлаа хэвийн хийгээд явж байгаа аж.
Энэ мэтээр эрх мэдэлтнүүдийн угж болсон Хөшигийн хөндийн нисэх буудал барих төсөлтэй холбоотой цуврал сурвалжлагыг үргэжлүүлэн хүргэх болно.
Эх сурвалж: factnews.mn
