Олон улсын жүдо бөхийн холбооноос өнгөрсөн амралтын өдрүүдэд Унгарын Будапешт хотод болсон “Их дуулга” ангиллын тэмцээний дараа дэлхийн чансааг шинэчилжээ.
Шинэ чансаагаар манай ихэнх тамирчид 1-3 байр ухарсан. Тухайлбал, эрэгтэйчүүдээс Б.Сүхбат, К.Ёолк, Б.Гончигсүрэн нар нэг, Т.Түмэнжаргал хоёр, Ё.Басхүү гурван байраар хойшилжээ. Харин эмэгтэйчүүдээс Ж.Анударь, Б.Ням-Эрдэнэ нар нэг, А.Адъяасүрэн хоёр байр ухарлаа.
Харин Будапештын “Их дуулга”-д оролцсон тамирчдаас хүрэл медаль хүртсэн гавьяат тамирчин Б.Баасанхүү 53 дугаар байр руу орж ирэв. Ингэснээр ДАШТ-д оролцох боломжтой болж байна.
Хоёр жилийн хугацаанд их спортоос завсарласан тэрбээр энэ тэмцээнд оролцохоос өмнө дэлхийн чансааны 116-д жагсаж байсан бөгөөд 63 байраар урагшилжээ. Түүнчлэн эмэгтэйчүүдийн 57 кг-д барилдсан олон улсын хэмжээний мастер Л.Сосорбарам есөн байр урагшилж, дэлхийн чансааны 49-д, 52 кг-д зодоглосон Б.Уранбаяр чансаагаа дөрвөн байраар ахиулан 39-д, -78 кг-д О.Хүслэн дөрвөн байр ахиж 114 дүгээрт жагсав.
Эрэгтэйчүүдээс 60 кг-д Н.Мэндсайхан зургаан байр урагшилж 135-д, 66 кг-д Ө.Жанцандорж 64 дүгээр байраа хадгалав. Харин залуу мастер Ө.Бямбасүрэн “Их дуулга”-аас авсан анхны медалийнхаа ачаар 446 байраар урагшилж, 69 дүгээрт жагслаа. Түүний хувьд энэхүү тэмцээнд зодоглохын өмнө 515 дугаарт эрэмбэлэгдэж байв. Мөн 73 кг-д Л.Анхзаяа наймдугаар байраа хадгалсан бол Л.Энхдөл чансаагаа 287 байраар ахиулан 210 дугаарт эрэмбэтэй болжээ.
Сэтгэгдэл бичих