Даваа гарагт Эрүүл мэндийн яамны гадаа Д.Сарангэрэлийг огцрохыг шаардсан жагсаал болж, Төв аймгийн Сүмбэр сумын ЕБС-ийн сурагчид олноороо сүрьеэгийн халдвар авсан тухай тэд мэдээлж, салбарын сайдыг огцруулж, мэргэжлийн хүнийг сайдаар томилох ёстой талаар хэлж байв.
Жагсаалд Ардчилсан намын Эрүүл мэндийн бодлогын зөвлөлийн дарга Ж.Амарсанаа “Бид Эрүүл мэндийн салбарыг сайжруулах, ирээдүйн үр хүүхдүүдээ аврахын төлөө жагсаж байна. Тус яаманд авлига, хээл хахуулийн асуудал тасрахаа байсан ба сайд сэтгүүлч мэргэжилтэй, мэргэжлийн бус хүн байгаа учраас энэ асуудлыг бага дээр нь намдааж чадсангүй. Тиймээс мэргэжлийн сайдыг томилох хэрэгтэй” талаар хэлсэн юм.
“Элэг бүтэн Монгол” үндэсний хөтөлбөрт 2018 оны 12 дугаар сарын байдлаар 786.250 хүн үзлэг, шинжилгээнд хамруулсан
Харин үүний хариуд Эрүүл мэндийн сайд Д.Сарангэрэл өчигдөр сүрьеэ өвчинтэй холбоотой үүсээд байгаа улс төрийн нөхцөл байдлын талаар мэдэгдэл хийсэн.
Энэ үеэрээ тун ноцтой зүйлийг хэлэв.
Дэлхийн эрүүл мэндийн байгууллагаас “Дэлхий загвар хөтөлбөр” болсныг сайшаасан Элэг бүтэн Монгол хөтөлбөрийг хэрэгжүүлж буй Хаппи Веритас оношилгооны төв 6324 хүнд тусламж үзүүлсэн гэх хуурамч баримтаар Эрүүл мэндийн даатгалын сангаас 758 сая төгрөг авсан байх магадлалтай гэдгийг салбарын сайд нь мэдээллээ.
Эрүүл мэндийн сайд Д.Сарангэрэл “Ж.Амарсанаа таны үйл ажиллагааны цаана улс төрийн ашиг сонирхол нуугдаж байдгийг баримтаар хэлье. Элэг бүтэн Монгол хөтөлбөрийн хүрээнд “Хаппи Веритас” эмнэлэг хувь нэмрээ оруулж байгаа бөгөөд элэгний вирүсийн шинжилгээ сөрөг гарсан 1882 хүн, эмчилгээнд огт ороогүй 4442 хүн нийт 6324 хүнд тусламж үзүүлсэн гэх хуурамч баримтаар эрүүл мэндийн даатгалын сангаас 758 сая төгрөг авсан байх магадлалтай” гэсэн юм.
Энэ асуудлаар хууль хяналтын байгууллагад хандсан бөгөөд иргэдийн эрүүл мэндийн эсрэг үйлдсэн гэмт үйлдэл гэж үзэх үндэслэлтэйг ЭМДЕГ-т мэдэгдсэн талаар салбарын сайд мэдэгдлийн үеэр дурдсан юм.
Салбарын сайдын хийсэн мэдэгдлээс “Элэг бүтэн Монгол” хөтөлбөрийн хэрэгжилтэд хяналт, шалгалт хийх шаардлага үүсээд байна.
“Элэг бүтэн Монгол” үндэсний хөтөлбөрт 2018 оны 12 дугаар сарын байдлаар 786.250 хүн үзлэг, шинжилгээнд хамруулсан. Тус хөтөлбөрийн хэрэгжилтэд 2017 онд Эрүүл мэндийн даатгалын сангаас нийтдээ 18,8 тэрбум төгрөг, 2018 онд 19,8 тэрбум төгрөг зарцуулсан.
2019 онд нийт 1053960 хүнийг халдвар илрүүлэх шинжилгээнд хамруулахаар зорьж байгаа бөгөөд В, С вирусийн халдвар илрүүлэх,ачаалал тоолох шинжилгээ хийх, эмийн үнийн зардалд ЭМДСангаас 32,7 тэрбум төгрөг зарцуулахаар төлөвлөжээ.
Сэтгэгдэл бичих