БНХАУ өнгөрсөн дөрөвдүгээр сард 7.43 сая коксжих нүүрс импортолсон байна. Энэ нь гуравдугаар сартай харьцуулахад 21 хувиар өссөн бол өнгөрсөн оны мөн үетэй харьцуулахад 61.1 хувиар өссөн үзүүлэлт юм.
Үүний тал буюу 3.69 сая тонн коксжих нүүрсийг Монгол Улсаас импортолсон нь өнгөрсөн гуравдугаар сартай харьцуулахад 12.9 хувиар өссөн үзүүлэлт болж байна. АНУ-тай хийж буй эдийн засгийн дайнаас үл хамааран Хятадын эрх баригчид тус улсаас өнгөрсөн сард нийт 308 мянган тонн коксжих нүүрс импортолсон аж. Харамсалтай нь худалдааны дайны хүрээнд тогтоосон 25 хувийн импортын тарифаас болж диллерүүд коксжих нүүрсээ зарж алдагдалд орохоос зайлсхийж, агуулахад хадгалан хүлээлтийн горим үүсгээд байна. Харин Хятадын эрх баригчид Австрали улстай үүсгэсэн цахим аюулгүй байдлын асуудлаас шалтгаалж өнгөрсөн сард ердөө 2.77 сая тонн коксжих нүүрсийг тэднээс импортолсон аж.
Хятад буюу дэлхийн хамгийн том коксжих нүүрсний зах зээлд ОХУ өнгөрсөн сард 504 мянган тонн, Индонез улс 44 мянган тонн коксжих нүүрс экспортолжээ. Их Британийн “The Argus”-ын мэдээлснээр өнгөрсөн сард дэлхийн зах зээл дээрх коксжих нүүрсний ханш тонн тутамд 203.26 ам.доллар байсан нь өнгөрсөн гуравдугаар сартай харьцуулахад 3.6 хувиар буурсан үзүүлэлт юм.
Харин “Fitch Solution”-ын үзэж байгаагаар 2019 онд дэлхийн зах зээл дээрх коксжих нүүрсний ханш тонн тутамд 195 ам.доллар байна гэж таамаглаж байна.Үүнийг Хятадын эдийн засгийн удаашрал болон АНУ, Хятадын хооронд болж буй худалдааны дайнд хэлмэгдсэн ган төмөрлөгийн үйлдвэрлэлийн идэвхгүй байдалтай холбон тайлбарлажээ.
Тэдний коксжих нүүрсний импорт ирэх саруудад өсөх төлөвтэй байгаа. Гэвч дэлхийн зах зээд дээрх коксжих нүүрсний ханш улс төрөөс хамааралтай эдийн засгийн хориг арга хэмжээнээс болж унасан хэвээр байвал ойрын ирээдүйд Монгол, Индонез болон Орос улсуудад алдагдалтай тусах аж. Харин том зургаар харвал 2028 он хүртэл дэлхийн зах зээл дээрх коксжих нүүрсний хэрэгцээ тогтмол өсөх хандлагатай байна. Мэргэжилтнүүдийн таамаглаж байгаагаар ОХУ 2026 он гэхэд Индонезыг гүйцэж дэлхийн гурав дахь том коксжих нүүрс экспортлогч болох аж. Мөн ирэх жилүүдэд Орос, Монгол, Энэтхэг зэрэг орнууд дэлхийн коксжих нүүрсний зах зээлд аажим аажмаар тэргүүлэгч улсууд болох Хятад болон Австралийн эзлэх хувийг булаана гэж зах зээлийн шинжээчид үзэж байна.
Эх сурвалж: The Argus, Mining.com
Сэтгэгдэл бичих