Архангай аймагт бага насны хүүхэд хойд эцгийнхээ гарт амиа алдсан ноцтой хэрэг 2025 оны аравдугаар сарын 20-ны шөнө гарсан бөгөөд уг хэргийн шүүх хурал 2026 оны хоёрдугаар сард болж, шүүгдэгч Д-д бүх насаар нь хорих ял оноожээ.
Хохирогч охин 3 нас 6 сартай байсан бөгөөд хэрэг гарах үед ээж, хойд эцгийн хамт айлд зочилж байсан байна. Тухайн үед томчууд согтууруулах ундаа хэрэглэж, шөнийн 23:00 цагийн орчимд ээж нь дэлгүүр явахдаа охиноо авч явахыг хүссэн ч яллагдагч “унтуулж байя” хэмээн үлдсэн байна.
Ээжийг буцаж ирэхэд гэрийн шал цус болсон, охин ухаангүй байдалтай орон дээр хэвтэж байсан бөгөөд хаалгыг онгойлгох үед шүүгдэгч “хүүхдийг чинь зодчихсон” хэмээн хэлсэн талаар мөрдөн шалгах ажиллагаанд мэдүүлжээ.
Мөрдөн шалгах явцад охины ээж шүүгдэгчтэй 2024 оны есдүгээр сард цахим орчноор танилцсан, өмнө нь гэр бүлийн хүчирхийлэл үйлдэж байсан, хүүхдийн үсийг зулгааж байсан талаар мэдүүлсэн байна. Хэрэг гарах үед тэрбээр гурван сартай жирэмсэн байжээ.
Харин яллагдагч Д согтууруулах ундаа хэтрүүлэн хэрэглэсний улмаас болсон үйл явдлыг санахгүй байгаа хэмээн мэдүүлсэн ч шүүх гэрчийн мэдүүлэг, шинжээчийн дүгнэлт болон бусад нотлох баримтад үндэслэн буруутайд тооцсон байна.
Улмаар шүүхээс түүнд бүх насаар нь хорих ял оноож, хаалттай хорих ангид эдлүүлэх шийдвэр гаргажээ.
Энэхүү хэрэг нь гэр бүлийн хүчирхийлэл, бага насны хүүхдийн эсрэг гэмт хэргээс урьдчилан сэргийлэх шаардлага өндөр байгааг дахин сануулж байна.
Сэтгэгдэл бичих