Газрын тосны зах зээлийн өнөөгийн нөхцөл байдал, Монгол Улсын шатахууны хангамж, үнийн хэлбэлзлийн талаар Аж үйлдвэр, эрдэс баялгийн яам (АҮЭБЯ) Засгийн газрын өнөөдрийн хуралдаанд танилцууллаа.
Дэлхийн зах зээл дээрх газрын тосны үнэ 2026 оны эхний хоёр сард харьцангуй тогтвортой, дунджаар 2.5 хувийн өсөлттэй байсан байна. Харин АНУ, Израилийн зүгээс Иранд чиглэсэн цэрэг, дайны үйл ажиллагаа эрчимжсэнтэй холбоотойгоор энэ сарын эхнээс үнэ тогтмол өсөх хандлагатай болжээ. Тухайлбал, Брент маркийн газрын тосны үнэ энэ сарын 8-ны өдөр баррель нь 108.23 ам.долларт хүрч өссөн бол өчигдрийн байдлаар 102.99 ам.долларт хүрсэн байна.
Шатахууны нөөцийн нөхцөл байдал
Аж үйлдвэр, эрдэс баялгийн дэд сайд Б.Энхтүвшин “Өнөөдрийн байдлаар Монгол Улсад:
-
Дизелийн түлш – 27 хоногийн нөөц
-
АИ-92 бензин – 40 хоногийн нөөц
-
АИ-95 бензин – 72 хоногийн нөөц
-
Онгоцны түлш – 22 хоногийн нөөц
-
Шингэрүүлсэн шатдаг хий – 35 хоногийн нөөцтэй байна” хэмээн мэдээлэв.
Мөн өнгөрсөн долоо хоногт үнийн зөвлөл хуралдаж, гуравдугаар сард шатахууны үнийг тогтвортой байлгах зөвлөмж гаргасан байна.
Түүнчлэн стратегийн бүтээгдэхүүний хангамж, нийлүүлэлтийг дэмжих чиглэлээр Монголбанк, арилжааны 17 банк, бизнес эрхлэгчдийн төлөөлөлтэй уулзалт зохион байгуулжээ. Энэ хүрээнд 150 мянган шоо метр багтаамжтай нефть бүтээгдэхүүн хадгалах савыг энэ онд багтаан барьж, ашиглалтад оруулахаар төлөвлөсөн байна. Одоогоор уг төсөлд оролцохоор 20 гаруй аж ахуйн нэгж санал ирүүлээд байгаа бөгөөд тэдгээрийг эрэмбэлэн санхүүжилтийн байгууллагуудад хүргүүлэх аж.
Засгийн газрын Хэвлэл мэдээлэл, олон нийттэй харилцах газраас “ОХУ-аас Монгол Улсад нийлүүлж буй шатахууны хил үнэ нь дэлхийн зах зээл дэх газрын тосны үнэтэй шууд хамааралтай. Иймээс дэлхийн зах зээл дээрх үнийн өсөлт нь дотоодын жижиглэнгийн шатахууны үнэд нөлөөлөхөөр байна” гэж мэдэгдлээ.
Сэтгэгдэл бичих