Шадар сайд Х.Ганхуяг “Шинэ хоршоо хөдөлгөөн”-ийн хүрээнд олгосон зээлийн зарцуулалттай холбоотой асуудлаар мэдээлэл өглөө. Тэрбээр зээлийн тодорхой хэсгийг зориулалтын бусаар ашигласан байж болзошгүй тул хяналт шалгалт эхлүүлж буйг мэдэгдэв.
Түүний хэлснээр “Шинэ хоршоо”-ны зээлийг дөрвөн банкаар дамжуулан олгож байсан бөгөөд одоогоор зээл олголтыг түр хугацаанд зогсоогоод байгаа аж. Урьдчилсан байдлаар нийт зээлийн 20-30 орчим хувь нь хэрэглээний зээл рүү орсон байх магадлалтай гэж үзэж байгаа бөгөөд хяналт шалгалтын дүн гарсны дараа зээлийг цаашид үргэлжлүүлэх эсэхийг шийдвэрлэх юм байна.
Мөн Засгийн газрын хуралдаанд “Уур амьсгалын Үндэсний хороо”-ны чиг үүргийг өөрчлөх тухай тогтоолын төслийг танилцуулахаар бэлтгэж байгаагаа тэрбээр хэллээ. Энэхүү өөрчлөлтөөр “Шинэ хоршоо хөдөлгөөн”-ийг уур амьсгалын бодлоготой уялдуулж, бэлчээрийн тогтвортой менежмент, ойжуулалт, экосистемийн нөхөн сэргээлтэд суурилсан нүүрстөрөгчийн төслүүдийг хэрэгжүүлэх боломж бүрдэнэ гэж үзэж байгаа юм.
Цаашид уг хөдөлгөөнийг төсвөөс хараат бус тогтолцоонд шилжүүлж, малчид бэлчээр болон байгаль орчноо хамгаалсныхаа үр шимийг нүүрстөрөгчийн төслөөр дамжуулан олон улсын зах зээлээс хүртэх боломжтой болгохоор зорьж байгааг Шадар сайд онцоллоо. Үүний хүрээнд Монгол Улсад хэрэгжих нүүрстөрөгчийн төсөл, хөтөлбөрийг нэгтгэх “Нүүрстөрөгчийн үндэсний бүртгэлийн систем” байгуулах шаардлагатай гэж үзэж байна.
Мөн “Шинэ хоршоо”-ны зээлийн талаарх малчдын санал хүсэлтийг И-Монголоор дамжуулан авах, түүнчлэн малчдын бүтээгдэхүүний борлуулалтыг дэмжих зорилгоор CU сүлжээ дэлгүүртэй хамтран нэг лангууг малчдын бүтээгдэхүүнд зориулж ажиллуулах санал гаргасан байна.
Цаашдын бодлогыг хоёр үндсэн чиглэлд төвлөрүүлэхээр төлөвлөжээ. Нэгдүгээрт, бэлчээрийн даац хэтэрсэн асуудлыг нүүрстөрөгчийн зах зээлтэй холбож, малчдад нэмэлт орлогын эх үүсвэр бий болгох. Үүний тулд нүүрстөрөгчийн зах зээлийг бүртгэлжүүлэх цахим системийг хөгжүүлэхэд ойролцоогоор 3 сая ам.доллар шаардлагатай гэж тооцоолсон байна. Хоёрдугаарт, агуулах, тээвэрлэлтийг хариуцах “дундын хоршоо”-ны тогтолцоог хөгжүүлэх аж.
Шадар сайд 11 аймагт ажиллах үеэрээ сайн үйл ажиллагаа явуулж буй хоршоод байгааг онцолж, махны экспорт нэмэгдэхэд хоршоод тодорхой хувь нэмэр оруулсан гэж дүгнэсэн байна. Гэхдээ хэрэглээний зориулалттай зээлийг төрөөс дэмжих нь зохисгүй гэсэн байр сууриа илэрхийллээ.
Сэтгэгдэл бичих