Монгол Улсын Боловсролын яамнаас 2026–2027 оны хичээлийн жилээс эхлэн их, дээд сургуулийн хичээлийн жилийн эхлэх хугацааг өөрчлөх талаар судалгаа хийж, холбогдох санал хүргүүлжээ.
Тодруулбал, их, дээд сургуулиудын сургалтын хөтөлбөрийг аравдугаар сарын 1-нээс эхлүүлэх хувилбарыг судалж, санал боловсруулсан байна. Харин уг судалгааны дүнг үндэслэн Пүрэвсүрэнгийн Наранбаяр сайд их, дээд сургуулиудын удирдлагад ирэх хичээлийн жилийг есдүгээр сарын 15-наас эхлүүлэх чиглэл өгсөн талаар мэдээлжээ.
Дээд боловсролын тухай хууль-ийн дагуу их, дээд сургуулиуд сургалтын хөтөлбөрөө бие даан баталж, хичээлийн жилийн эхлэх хугацааг өөрийн онцлогт нийцүүлэн тогтоох эрхтэй байдаг. Иймээс сургалтын байгууллагууд өөрсдийн нөхцөл боломжид тулгуурлан хичээлийн жилийн эхлэх хугацааг шийдвэрлэх боломжтой аж.
Хичээлийн жилийн эхлэх хугацааг өөрчлөх асуудлыг судлахдаа цэцэрлэг, ерөнхий боловсролын болон их, дээд сургуулийн хичээлийг нэгэн зэрэг эхлүүлэх нь эцэг, эхчүүдэд санхүү болон цаг хугацааны давхар ачаалал үүсгэдэг нөхцөл байдлыг харгалзан үзсэн байна.
Мөн Монгол орны байгаль, цаг уур, хүн амын амьдралын хэв маяг, уламжлалт ахуй соёлын онцлогийг харгалзан үзжээ. Намрын улиралд өрнөдөг ургац хураалт, хадлан тэжээл бэлтгэх, өвлийн бэлтгэл хангах ажил болон мал аж ахуйд түшиглэсэн өрхийн хөдөлмөрийн онцлогтой зохицуулах нь нийгэм, эдийн засгийн ач холбогдолтой гэж үзсэн байна.
Иймд хичээлийн жилийн эхлэх хугацааг тодорхой хэмжээнд хойшлуулах нь орон нутаг болон өрхийн амьдралын нөхцөлд илүү зохистой шийдэл болно гэж Боловсролын салбарын удирдлагууд үзжээ.
Сэтгэгдэл бичих