БЭЭЖИН, 2026 оны гуравдугаар сарын 10 /Xinhua/. Хятадын төрийн эрх барих дээд байгууллага болох 14 дэх удаагийн сонгуулийн Бүх Хятадын Ардын Төлөөлөгчдийн Их Хурлын (БХАТИХ) IV чуулганы хоёрдугаар бүгд хурал өчигдөр буюу даваа гарагт болж, БХАТИХ-ын Байнгын хороо, Ардын дээд шүүх, Ардын дээд прокурорын ажлын тайланг сонсож, хянан хэлэлцүүлжээ.
Уг хуралд Ши Жиньпин, Ли Чян, Ван Хунин, Цай Чи, Дин Сюэшян, Ли Ши, Хань Жөн зэрэг нам, төр засгийн удирдагчид оролцсон байна.
Хурлын үеэр БХАТИХ-ын Байнгын хорооны дарга Жао Лэжи Байнгын хорооны ажлын тайланг танилцуулахдаа, өнгөрсөн онд ажлын олон чиглэлд шинэ ахиц гарсныг тэмдэглээд, БХАТИХ-ын Байнгын хороо нь Хятадын онцлогтой социалист эрх зүйт тогтолцоог боловсронгуй болгох, мөн хууль дээдлэх зарчимд тулгуурласан социалист улсыг илүү өндөр түвшинд байгуулах чиглэлд хүчин чармайлт гаргасныг дурджээ. Мөн 15 дугаар таван жилийн төлөвлөгөөг амжилттай хэрэгжүүлэхэд бодитой хувь нэмэр оруулж, өндөр бүтээмжтэй ажиллахаа мэдэгдээд, энэ онд хэрэгжүүлэх гол зорилт, чиглэлүүдийг танилцуулсан байна.
Ардын дээд шүүхийн дарга Жан Жунь байгууллагынхаа тайланг танилцуулахдаа, өнгөрсөн онд Хятадын шинэчлэлийг урагшлуулахын тулд шүүхийн үйлчилгээг өндөр чанартай үзүүлэхэд анхаарч ажилласныг дурдаад, 2026 онд Хятадын шүүх байгууллагууд нийгмийн шударга ёсыг хамгаалан дэмжихэд илүү их анхаарал хандуулж, мөн шүүхийн үйлчилгээг чанартай үзүүлэх, 15 дугаар таван жилийг амжилттай эхлүүлэхийн тулд хэрэг хянан шийдвэрлэх ажиллагааг чангатгана гэдгийг мэдэгдсэн байна.
Ардын дээд прокурорын газрын ерөнхий прокурор Ин Юн прокурорын байгууллага өнгөрсөн онд хэрэг бүрийг үр дүнтэй, шуурхай шийдвэрлэж, ажилдаа шинэ амжилт гаргасныг дурдав. 2026 онд прокурорын байгууллагууд нийгмийн шударга ёс, эрх тэгш байдлыг хамгаалах, дэмжих чиглэлд хүчин чармайлтаа нэмэгдүүлж, хууль сахиулах төрийн үүргээ гүйцэтгэх болно гэж тэрбээр хэлжээ.
Даваа гаргийн хурлаар БХАТИХ-ын Байнгын хорооны хууль тогтоомжид өөрчлөлт оруулах талаар хийсэн ажлын тайлан, зарим хууль, шийдвэрийн талаарх санал дүгнэлтийг хэлэлцүүлэхээр өргөн барьсан байна.
Сэтгэгдэл бичих