АНУ-ын ерөнхийлөгч Дональд Трамп Даваа гаригт /2026.03.09/ ОХУ-ын ерөнхийлөгч Владимир Путинтэй Украин болон Ойрхи Дорнодын мөргөлдөөний талаар утсаар ярилцжээ. Тэдний яриа нэг цаг орчим үргэлжилсэн бөгөөд тун үр дүнтэй болсон гэж Трамп хэлжээ. Мөн “Путин, Зеленский нарын хооронд асар их өш хонзон бий. Тэд ойлголцож чадахгүй байгаа ч харилцан яриа эерэг боллоо гэж би бодож байна.
Путин Ираны мөргөлдөөнийг шийдэхэд тус болохыг хүсч байна гэсэн. Орос, Украины дайныг дуусгаж байж та тус болж чадна гэж би хэлсэн” гэжээ.
Путины гадаад бодлогын зөвлөх Юрий Ушаковын хэлснээр Оросын ерөнхийлөгч Ираны мөргөлдөөнийг улс төрийн болон дипломат аргаар хурдан зогсоох санал дэвшүүлсэн аж. Үүнд Персийн булангийн орнуудын удирдагчид, Ираны ерөнхийлөгч болон бусад олон улсын албан тушаалтнуудтай холбоо тогтоох зэрэг багтана.
Харин Орос, Украины дайны талаар Путин хэлэхдээ “Киев тохиролцоонд хүрэх хэрэгтэй. Оросын хүчин амжилттай урагшилж байгаа” гэжээ. Гэвч Украины тал үүнийг үгүйсгэж байгаа бөгөөд харин ч хоёрдугаар сард Киев илүү их хэмжээний газар нутгийг эзэлсэн гэж мэдэгдсэн байна.
Оросын хэвлэлд мэдээлснээр, Путин, Трамп нар Венесуэлийн асуудлыг ч хэлэлцжээ. Тэр дундаа дэлхийн газрын тосны зах зээл, эрчим хүчний үнийн өсөлтийн талаар хэлэлцсэн байна.
Сэтгэгдэл бичих