Хятад Улс Африк тивийн Хятадтай дипломат харилцаатай 53 улсын бүтээгдэхүүнд импортын татвар ногдуулахгүй буюу 0% болгох шийдвэр гаргалаа. Энэ шийдвэр 2026 оны 5-р сарын 1-ээс хэрэгжиж эхэлнэ.
Шинэ бодлогын дагуу Африкийн орнуудаас Хятад руу экспортлох бараа бүтээгдэхүүн 100 хувь татваргүй нэвтрэх боломжтой болно. Ингэснээр Африкийн кофе, какао, хөдөө аж ахуйн бүтээгдэхүүн, нэхмэл эдлэл, ашигт малтмал зэрэг олон төрлийн бүтээгдэхүүн Хятадын зах зээлд илүү өрсөлдөх чадвартай болох юм.
Энэ шийдвэр нь өмнө хэрэгжиж байсан хөнгөлөлтийг өргөжүүлсэн хэлбэр юм. Өмнө нь Хятад Улс зөвхөн Африкийн хамгийн буурай хөгжилтэй 33 улсад ихэнх бараанд татварын хөнгөлөлт олгодог байсан бол шинэ бодлогоор бараг бүх Африк тивийг хамруулж байна.
Харин Эсватини Улс энэ бодлогод хамрагдахгүй бөгөөд учир нь тус улс Тайваньтай дипломат харилцаатай хэвээр байгаа юм.
Шинжээчдийн үзэж байгаагаар, энэхүү шийдвэр нь Хятад-Африкийн худалдааны эргэлтийг нэмэгдүүлэх зорилготой. 2025 оны эхний байдлаар хоёр талын худалдааны хэмжээ 222 тэрбум ам.долларт хүрээд байгаа бөгөөд татвар тэглэснээр Африкийн экспорт нэмэгдэх боломжтой гэж үзэж байна.
Хятад Улс мөн Африкийн орнуудтай эдийн засгийн түншлэлийн хэлэлцээрүүдийг үргэлжлүүлэн байгуулж, тус тивийн бараа бүтээгдэхүүнийг Хятадын зах зээлд нэвтрүүлэх “ногоон суваг” зэрэг механизмыг өргөжүүлэхээ мэдэгджээ.
Сэтгэгдэл бичих