Ойрхи Дорнодод мөргөлдөөн даамжирсаар байгаа тул Өмнөд Солонгос улс хүмүүнлэгийн санааны үүднээс иранчуудыг визний хугацаа хэтрүүлэн үлдэхийг зөвшөөрчээ. Тодруулбал, визээ сунгах, эсвэл визний статусаа өөрчлөх боломжгүй байгаа ирануудад нөхцөл байдал тогтворжтол Өмнөд Солонгост байх зөвшөөөрлийг тус улсын Хууль зүйн яам олгож байна. Уг арга хэмжээ нь бичиг баримтгүй иранчуудад ч хамаатай.
Энэ оны нэгдүгээр сарын байдлаар Өмнөд Солонгост хууль ёсоор оршин сууж буй 2133 иран үндэстэн байна.
Өмнөд Солонгосоос гадна Канад, Япон, Энэтхэг, Катар зэрэг улсууд цагаачлалын дүрэм журмаа сулруулах, нутаг буцвал аюултай байдалд орсон иранчуудад түр хамгаалалт олгох зэрэг арга хэмжээг хэрэгжүүлжээ.
Өмнөд Солонгос улсын Хууль зүйн яам гадаадын иргэдийг эх оронд нь дайн, мөргөлдөөн гэх мэт онц ноцтой байдал үүссэн үед албадан буцаадаггүй. Тэднийг албадан буцаах эсэх нь тухайн улс руу нислэг үйлдэх боломж, орон нутгийн аюулгүй байдлын түвшин зэрэг хүчин зүйлтэй шууд хамаарна.
Харин Иранд байгаа солонгос иргэдийг нэн даруй эргэж ирэх, аялал төлөвлөсөн бол цуцлахыг Өмнөд Солонгосын Гадаад хэргийн яам анхааруулж байна. Аяллын хориг зөрчиж Иранд ирсэн, тэнд үлдсэн солонгосчуудад шийтгэл онооно гэдгийг мөн мэдэгджээ. Одоогоор Иранд 40 орчим солонгос иргэн байна. Хэрвээ тус улсад үлдэхийг хүсвэл хуулийн дагуу зөвшөөрөл авах ёстой бөгөөд энэ үйл явц нь ихэвчлэн нэг сараас илүү хугацаа шаарддаг.
Сэтгэгдэл бичих