2025 оны наймдугаар сарын 27-нд Өмнөд Солонгосын Үндэсний Ассамблейн гишүүд шинэ хуулийн төслийг баталжээ. Шинэ хуулиар сурагчид 2026 оны хичээлийн шинэ жилээс эхлэн анги танхимд гар утас болон бусад ухаалаг дижитал төхөөрөмж ашиглахыг бүрэн хориглоно гэж албан ёсоор мэдэгдсэн байна.
Хууль нь бага, дунд, ахлах ангид суралцаж байгаа бүх сурагчдад хамаарч, анги дотор гар утас гаргах, ашиглахыг хориглоно. Хэрэв сурагчид зайлшгүй тохиолдолд (жишээ нь ямар нэгэн яаралтай нөхцөл эсвэл сургалтын зориулалттай тусгай хэрэглээ) гар утас ашиглах шаардлагатай бол тухайн нөхцөлд багш, сургалтын удирдлагын зөвшөөрөл авах нөхцлийг хуульчилсан байна.
Шинэ хууль батлагдсанаар Өмнөд Солонгос нь утасны хэрэглээний сөрөг нөлөөг багасгах, сурагчдын суралцах анхаарал төвлөрлийг нэмэгдүүлэх, сошиал медиа хэт хамаарлыг бууруулах зорилготой олон улсын улс орнуудын нэг болж байна. Улсын боловсролын байгууллагын судалгаагаар өсвөр үеийнхний дунд ухаалаг утас ашиглах дадал нь сурлагын амжилтад сөрөг нөлөө үзүүлж, сурагчдын анхаарал төвлөрөл, сэтгэлзүйн байдалд муугаар нөлөөлж буйг тогтоожээ.
Өмнөх жилүүдэд тус улсын зарим сургууль өөр өөрийн дотоод журмаар гар утасны хэрэглээг хязгаарласан байсан ч энэ удаад бүх сургуулиудад ижил стандарт, хуульчилсан зохицуулалт үйлчлэхээр боллоо. Хуулийг батлахдаа 163 гишүүний 115 нь дэмжсэн санал өгсөн байна.
Хэдийгээр энэ шинэ хориг нь сурагчдын сурлагын амжилтад эергээр нөлөөлнө гэж үзэж байгаа ч зарим сурагч, эцэг эх, хүний эрхийн байгууллагууд гар утас хэрэглээг хязгаарлах энэ шийдвэр нь хувийн эрх, харилцааны эрхэд нөлөөлж болзошгүй талаар шүүмжилж буй талаар зарим эх сурвалж мэдээлсэн байна.
Сэтгэгдэл бичих