Монгол Улсын Засгийн газар 2025 оны 2 дугаар сард олон улсын санхүүгийн зах зээлийн таатай нөхцөл байдлыг ашиглан Засгийн газрын дунд хугацааны өрийн удирдлагын стратегийн дагуу “Сенчири IV” төслийн хүрээнд 5 жилийн хугацаатай 500.0 сая ам.долларын бондыг 6.625 хувийн хүүтэйгээр арилжаалж 2026 онд эргэн төлөгдөх Номад бонд болон 2028 онд эргэн төлөгдөх “Сенчири-2” бондын зарим хэсгийг дахин санхүүжүүлж, буцаан худалдан авах өрийн зохицуулалтын арга хэмжээг амжилттай хэрэгжүүлсэн билээ.
Олон улсын санхүүгийн нэр хүнд бүхий “The Asset” сэтгүүлээс жил бүр санхүүгийн салбарын шилдэг хэлцлүүдийг шалгаруулдаг “The Asset Triple A Awards”-д Монгол Улсын Засгийн газрын 2025 онд авч хэрэгжүүлсэн дээрх өрийн зохицуулалтын арга хэмжээг “Significant Deal-Best Liability Management 2025”-хамгийн шилдэг өрийн зохицуулалтын арга хэмжээ төрөлд шалгарууллаа.
Энэхүү шагнал нь Монгол Улсын Засгийн газар санхүүгийн сахилга бат, хариуцлагатай өрийн удирдлагыг тууштай хэрэгжүүлж буйг, мөн олон улсын хөрөнгө оруулагчдын итгэлийг хадгалж чадсаны тод жишээ болж байна.
Энэхүү өрийн зохицуулалтын арга хэмжээ нь олон улсын мэргэжлийн хөрөнгө оруулагчдын өндөр итгэлийг хүлээж, 184 хөрөнгө оруулагчаас 2.8 тэрбум ам.долларын захиалга ирсэнээр үнэт цаасны нөхцөлийг илүү таатай болгох боломжийг бүрдүүлсэн.
Үүний үр дүнд Монгол Улс олон улсын санхүүгийн зах зээлээс илүү хямд өртөгтэй санхүүжилт татах боломжтой юм.
Тус хэлцлийг Credit Agricole CIB, Deutsche Bank, HSBC, J.P. Morgan зэрэг дэлхийн тэргүүлэх санхүүгийн байгууллагууд хамтран зохион байгуулж, Монгол Улсын санхүүгийн бодлого, олон зах зээлтэй харилцах чадавхийг олон улсын тавцанд бататгалаа.
Дээрх өрийн зохицуулалтын арга хэмжээ нь Монгол Улсын төсөв, төлбөрийн тэнцэлд ирэх жилүүдэд үүсэх байсан өрийн дарамтыг бууруулж, гадаад валютын ханшийг тогтвортой барихад эерэг нөлөө үзүүлж, Монгол Улсын зээлжих зэрэглэлийг сайжруулах, хэвээр хадгалахад чухал нөлөө үзүүлсэн юм.
Сангийн яам цаашид эдийн засгийн тогтвортой өсөлтийг дэмжих, улсын өрийн удирдлагыг илүү үр ашигтай, ил тод хэрэгжүүлэх бодлогыг үргэлжлүүлэн хэрэгжүүлэх болно.
Эх сурвалж: The Asset Triple A Sustainable Finance Awards 2026 – Best Deals – North Asia
Сэтгэгдэл бичих