Ардчилсан намын дарга, УИХ дахь Ардчилсан намын бүлгийн дарга О.Цогтгэрэл, УИХ-ын гишүүн Д.Ганбат, А.Ганбаатар нарын тэргүүтэй төлөөлөгчид АНУ-ын Ардчиллын үндэсний санд зочилж сангийн Ерөнхийлөгч Дэймон Уилсон, дэд захирал Брайн Жозеф, хөтөлбөрийн ахлах менежер Пема Туласан нартай ажил хэргийн уулзалт хийлээ.
Ардчиллын Үндэсний Сан бол дэлхий даяар эрх чөлөөг хамгаалан сурталчилж ардчиллыг бэхжүүлэхэд дэмжлэг үзүүлэх, АНУ-ын төсвөөс санхүүждэг ашгийн бус, төрийн бус сан бөгөөд Монгол улсад 1990-ээд оноос хойш төрийн бус байгууллагуудуудаар дамжуулан цөөнгүй төсөл хэрэгжүүлж ирсэн юм.
Сангийн Ерөнхийлөгч Дэймон Уилсон Монгол Улсын 35 жилийн ардчиллын хөгжлийг бид бахархан ажиглахын зэрэгцээ энэ түүхийг бүтээхэд Ардчилсан намын гүйцэтгэсэн үүргийг сайшааж өндрөөр үнэлдэг хэмээн онцоллоо.
Тэрээр мөн манай түнш орнууд ардчилсан, хууль дээдэлдэг, хариуцлагатай улс байх нь өөрөө АНУ-ын эрх ашигт нийцнэ, энэхүү зөөлөн хүчний бодлогыг АНУ-ын хоёр голлох нам хоёулаа дэмждэг тул улсын төсвөөсөө ардчилалд хөрөнгө оруулдаг хэмээгээд цаашид Монголын ардчиллын үйл явцыг дэмжиж хамтын ажиллагаагаа өргөжүүлэхэд бэлэн байгаага илэрхийлэв.
Ардчилсан намын төлөөлөгчдийн зүгээс байгалийн баялагт суурилсан эдийн засгийн хувьд, иргэн бүрт өсөлт хөгжлөөс үр шим хүртэх баталгаа нь хууль засаглах ёс тул өмчийн эрх, гэрээний эрх, бизнесийн эрхийг хангасан хууль эрх зүйн орчин бүрдүүлэхээр ажиллаж буйгаа танилцуулсныг АҮС-ийн удирдлагууд олзуурхан хүлээж авч энэ чиглэлээр туршлагатай олон улсын судлаачид, мэргэжлийн байгууллагатай холбон дэмжиж ажиллахаар боллоо.
Сэтгэгдэл бичих