С.Зориг агсны хэрэгт холбогдогчдыг эрүүдэн шүүсэн гэх 26 минутын бичлэгийг УИХ-ын гишүүд үзэж дуусчээ. Уг бичлэгийн талаар УИХ-ын гишүүдээс тодруулахад, ХНХ-ын сайд С.Чинзориг “Шөнө өрөөнд нь орж дарамталсан бичлэг байна” гэсэн бол УИХ-ын гишүүн С.Жавхлан “Хэцүүхэн бичлэг байна” гэсэн юм.
Харин Шадар сайд Ө.Энхтүвшин “Айхтар бичлэг байна. Олон нийтэд үзүүлэх боломжтой болсон. Гэхдээ даралт ихтэй хүн үзмээргүй юм байна” гэлээ.
УИХ-ын гишүүн М.Оюунчимэг “Хэвлэлийнхэн маань үнэний дуу хоолой болохоор үзэх хэрэгтэй. Харин олон нийтэд үзүүлэх шаардлагагүй гэж бодож байна. Үнэхээр аймаар бичлэг байна” хэмээн сэтгэгдлээ илэрхийллээ.
УИХ-ын гишүүн Ж.Энхбаяр “Зургаан өдрийн бичлэгээс түүвэрлэж харууллаа. Үүнд хүнийг хүчээр эрүүдэн шүүж, дарамталж хэрэг хүлээлгэснийг гишүүд бодитой дуу дүрстэйгээр харлаа” гэв.
Эрүүдэн шүүсэн гэх бичлэгийн тухайд ЗГХЭГ-ын дарга Л.Оюун-Эрдэнэ тайлбарлахдаа “Засгийн газрын тогтоолоор С.Зоригийн амь насыг хохироосон хэргээр яллагдагч Б.Содномдаржаа, Т.Чимгээ, гэрч Б.Булган нарыг хэрэг хүлээлгэхийг шахаж, дарамталсан бичлэгийг төрийн нууцаас гаргасан. Энэхүү бичлэгт Б.Содномдаржаа, Т.Чимгээ нарын өрөөнд уг хэрэгт сэжиглэгдэж байсан Ц.Амгаланбаатар, ШШГЕГ-ын ажилтан Б, хүн амины хэрэгт ял эдэлж буй И нар эрүүдэн шүүх замаар хэрэг хүлээхийг шаардсан дүрс байгаа.2015.09.01-нээс 2017 оны зургадугаар сар хүртлэх хугацаанд хамаарах бичлэг бий. Үүнээс эхний зургаан өдрийн бичлэгийг ТЕГ-аас олон нийтэд үзүүлэх боломжтой гэсэн дүгнэлт хийсэн” хэмээсэн билээ.
Дашрамд дурдахад, С.Зориг агсны хэрэгт холбогдогчдыг эрүүдэн шүүсэн бичлэгийг гишүүдэд үзүүлэхдээ нууцлалыг хангах үүднээс Төрийн ордны хамгаалалтыг нэмэгдүүлж, сүлжээ унагагч төхөөрөмж ашигласан юм.
ШУУД ҮЗЭХ
Сэтгэгдэл бичих