ОБЕГ-аас төв, орон нутгийн Онцгой байдлын байгууллагын эмч-сэтгэл зүйч, сувилагч, эмнэлгийн мэргэжилтэн нарын “Мэдлэгт суурилсан шийдвэр гаргалтыг сайжруулах нь” сэдэвт сургалтыг Дархан-Уул аймгийн Онцгой байдлын газар, АШУҮИС-ийн Дархан-Уул аймаг дахь салбар Анагаах ухааны сургуулийг түшиглэн зохион байгуулж байна.
Сургалтын арга хэмжээний үеэр ОБЕГ-ын дэд дарга, хурандаа Ц.Уранчимэг оролцож, хэлсэн үгэндээ “Онцгой байдлын ерөнхий газраас 2025 онд алба хаагчдын хөдөлмөрийн аюулгүй байдал, эрүүл ахуй, эрүүл мэндийн хамгааллыг сайжруулах зорилтыг дэвшүүлэн ажиллаж байна. Алба хаагчдын хөдөлмөрийн эрүүл мэндийг хамгаалах, сэтгэл зүйн эрүүл дархлааг дэмжих, өвчлөлөөс урьдчилан сэргийлэх нь зөвхөн байгууллагын дотоод зорилт бус, үндэсний аюулгүй байдлын баталгааны нэг хэсэг юм. Иймээс бид шинжлэх ухаанч хандлагад суурилан, сайн туршлага, мэргэжлийн судалгаанд тулгуурласан сургалт, эмчилгээ, сэтгэл зүйн үйлчилгээний нэгдсэн тогтолцоог бүрдүүлэх нь чухал. Энэ нь зөвхөн алба хаагчдын эрүүл мэндийг хамгаалаад зогсохгүй, гамшиг осолд нэрвэгдсэн иргэдэд үзүүлэх тусламж, үйлчилгээний үр дүнг нэмэгдүүлэх ач холбогдолтой. Тиймээс та бүхний сурсан мэдлэг, дадлага туршлагаа ажилдаа хэрэгжүүлж, алба хаагчдын эрүүл мэндийг хамгаалах, Монгол Улсын гамшгаас хамгаалах чадавхыг бэхжүүлэхэд үнэтэй хувь нэмрээ оруулна гэдэгт итгэлтэй байна” гэлээ.
Сургалтад төв, орон нутгийн Онцгой байдлын байгууллагын эмч-сэтгэл зүйч, сувилагч, эмнэлгийн мэргэжилтэн нарын 40 орчим алба хаагч хамрагдаж байна.
Сургалтаар эмнэлгийн мэргэжилтний хууль, эрх зүйн үндсэн ойлголт, харилцаа хандлага, ёс зүй, цусны даралт ихсэх эмгэгийн шалтгаан урьдчилан сэргийлэлт, тархины цус харвалт, зүрхний шигдээсийн оношилгоо, эмчилгээний зарчим, орчин үеийн чиг хандлага, зүрхний цахилгаан бичлэгийн өөрчлөлтийг унших аргачлал, гамшгийн үеийн сэтгэцийн эрүүл мэнд, сэтгэл зүйн анхан шатны дэмжлэг, сэргээн засах эмчилгээний өнөөгийн байдал, хөгжлийн чиг хандлагын талаар холбогдох эмч, мэргэжитнүүд мэдээлэл өгч, мэргэжлийн ур чадвараа дээшлүүлж байна.
Сэтгэгдэл бичих