Банкны хар жагсаалтыг халж буй талаар ЦХИХХ-ны сайд Э.Батшугар болон холбогдох албаныхан мэдээлэл хийлээ.
Хурлын үеэр зээлийн мэдээллийн тухай хуулийн нэмэлт, өөрчлөлт өнөөдрөөс хэрэгжиж эхэлснийг онцлов. Ингэснээр иргэд зээлийн онооны системд шилжиж, хар жагсаалт байхгүй болж байгаа юм. Өмнөх зохицуулалтаар хар жагсаалтад багтсан иргэн авсан зээлээ бүрэн төлсөн ч дахин зээл авах хүртэл зургаан жил хүлээх шаардлагатай байв. Зээлийн мэдээлэл нийлүүлэгч байгууллагууд үйл ажиллагаагаа энэ сарын 15-ны дотор шинэчилж дуусна. Иргэд зээлийн оноонд шилжих бөгөөд суурь нь 511 оноо байх юм. Энэ оноо нь тухайн хүн төлбөрийн чадамжтай гэдгийг илэрхийлэх юм байна. Харин зээлийн хугацаа хэтэрсэн, хар түүхтэй багаас эхлэх боловч цаашид сайжрах боломжтой. Зээлийн онооны дээд хязгаар нь 999 байна. Иргэдийн зээлийн дундаж оноо 650 байх бөгөөд үүнээс дээш байвал зээлийн хүү буурах гэх мэт давуу талтайг албаныхан хэллээ.
ЦХИХХ-ны сайд Э.Батшугар ярихдаа “2025 оны тавдугаар сард Зээлийн мэдээллийн тухай хуулийн нэмэлт, өөрчлөлтийг санаачлан УИХ-аар батлуулсан. Үүний дагуу өнөөдөр Монголбанкны ерөнхийлөгч тушаал гаргаж, ААН болон иргэдийн арилжааны банкны хар жагсаалтыг хүчингүй болголоо. Энэ тушаал зээлийн мэдээллийн санд мэдээлэл нийлүүлдэг бүх байгууллагад хамааралтай. Ингэснээр 70 мянга орчим иргэн, ААН хар жагсаалтаас гарч байна. Шинэ зохицуулалтаар зээлээ хугацаанд нь төлсөн иргэнийг урамшуулдаг онооны систем рүү шилжиж байна. Ингэснээр илүү таатай нөхцөлөөр санхүүгийн үйлчилгээ авах боломж бүрдэнэ” гэв.
Зээлийн мэдээллийн санд 12 банк, 436 банк бус санхүүгийн байгууллага, харилцаа холбооны компаниуд, төрийн яам, агентлагуудын дэргэдэх сан, хадгаламж зээлийн хоршоо гэх мэтчилэн төр, хувийн хэвшлийн байгууллага, иргэн, аж ахуй нэгжийн зээл, төлбөрийн үүргийн талаарх мэдээллийг нийлүүлдэг бөгөөд 2025 оны байдлаар 1.6 сая иргэн, 19.6 мянган аж ахуйн нэгжийн зээлийн мэдээллийг хадгалж байгаа ажээ.
Ташрамд дурдахад, Зээлийн мэдээллийн тухай хуульд нэмэлт, өөрчлөлт оруулах тухай хуулийн төслийг 2024 оны 12 дугаар сарын 24-ний өдөр УИХ-д өргөн барьсан юм.
Сэтгэгдэл бичих