Түргэн хоолны “KFC” сүлжээ хоолны газрын Зайсан дахь салбараар үйлчлүүлсэн иргэд хоолны хордлогод орж, өнөөдрийн байдлаар 22 хүн Халдварт өвчин судлалын үндэсний төвд хэвтэн эмчлүүлж байгаагийн зургаа нь бага насны хүүхэд байгаа юм.
Албаныхны өгч буй хамгийн сүүлийн үеийн мэдээллээр, ХӨСҮТ-д сүүлийн дөрөв хоногийн хугацаанд нийт 80 гаруй иргэн “KFC” сүлжээний Зайсан салбарт пицца, бургер, тахиа идсэн гэх өгүүлэмжтэйгээр хандаж, эмнэлгийн тусламж үйлчилгээ авсан ба биеийн байдал хүндэрсэн иргэд тус эмнэлэгт үргэлжлүүлэн эмчлүүлж байна.
Дээрх асуудалтай холбогдуулан Эрүүл мэндийн яамнаас, хоёрдугаар сарын 9, 10, 11-нд Зайсан дахь “KFC” сүлжээ ресторанаар үйлчлүүлсэн хүмүүсийг харьяа дүүргийн эрүүл мэндийн төв болон ХӨСҮТ-д хандахыг зөвлөсөөр байгаа юм.
Одоогоор хордлого гарсан гэх “KFC” сүлжээ хоолны газрын Зайсан дахь салбарын үйл ажиллагааг түр зогсоосон байгаа. Тухайн өдөр худалдаанд гаргасан хоолноос дээж авч, лабораторид шинжилсэн ба тус салбарын 27 ажилтныг эрүүл мэндийн үзлэгт хамруулаад байгаа юм. Түүнчлэн шаардлагатай шалгалтын ажиллагааг үргэлжлүүлж, лабораторийн шинжилгээний хариу хүлээж байна гэж Мэргэжлийн хяналтын ерөнхий газраас мэдээллээ.
ХОРДСОН ИРГЭДИЙН ЯРИАНД АНХААРАЛ ХАНДУУЛНА УУ!
Хоолны хордлогын улмаас ХӨСҮТ-д хэвтэн эмчлүүлж байгаа болон эмнэлгээс гарсан зарим иргэдтэй холбогдлоо. Тэд дараах мэдээллийг өгч байна.
-БИДНИЙГ ТҮРГЭНЭЭР ОЧИХОД “KFC”-ЭЭР ҮЙЛЧЛҮҮЛСЭН БОЛ ЯАРАЛТАЙ ЭМНЭЛЭГТ ХЭВТ ГЭЖ ХЭЛСЭН –
Иргэн Х.А: –Хоёрдугаар сарын 11-ний өдөр нөхөр, хоёр хүүхдийн хамт Зайсангийн “KFC” салбарт очиж, тахиа, бургер, шарсан төмс захиалж идсэн. Уух зүйлээр кола ундаа авсан. Хооллосноос хойш ердөө цаг хүрэхгүй хугацааны дараа долоон настай хүү маань халуурч, бөөлжиж эхэлсэн. Удалгүй нөхөр бид хоёр бөөлжиж, гүйлгэж эхэлсэн учраас түргэн дуудаж, Халдвар өвчин судлалын үндэсний төвд хүргүүлж очсон. Биднийг очиход эмч нар нь шууд л “KFC-гээр үйлчлүүлсэн үү” гэж асуугаад, “Яаралтай хэвт” гэсэн. Манай хоёр ойтой хүүхэд тахиа огт идээгүй. Зөвхөн шарсан төмс идсэн болохоор хордлого аваагүй. Харин нөхөр, том хүү бид гурав тахиа идсэн учраас хордсон юм байна гэж бодож байна. Эмнэлэгт хэвтсэнээс хойш “KFC”-гээр үйлчлүүлсэн гэсэн маш олон хүн ирж байгаа. Гэхдээ зарим нь ажилтай гээд гэрээр эмчилгээ бичүүлээд явж байна лээ. Бид маш их гомдолтой байна. Одоо хүртэл гүйлгэлт зогсохгүй, зовиуртай байна. Том хүн ийм их зовиуртай байхад хүүхдүүдэд маш хүнд тусч байгаа нь ойлгомжтой. Эмнэлэгт ирсэн хүмүүсийн дийлэнх нь хүүхдүүд байгаа харагдсан.
-ХОЁРДУГААР САРЫН 1-НД ҮЙЛЧЛҮҮЛСЭН. ТЭР ӨДРӨӨ ХОРДЛОГО АВСАН-
Иргэн Б.Ж: -Манай ээж /57 настай/, хүү /4 настай/ хоёр хоёрдугаар сарын 1-ний өдөр Зайсангийн “KFC” салбар орж тахиа, бургер, төмс авч идсэн. Уусан зүйл нь Кока кола ундаа байсан юм билээ. Ирэхдээ надад савласан тахиа авчирсан боловч түүнийг нь би идээгүй, хөргөгчиндөө хийчихсэн. Гэтэл ээж, хүү хоёр гэртээ орж ирснээсээ хойш удалгүй бөөлжиж, халуурч эхэлсэн. Ингээд Түргэн тусламж дуудаж, Хан-Уул дүүргийн нэгдсэн эмнэлэгт очсон. Эмч нар “Яаралтай хэвтэж эмчлүүл, хоолны хордлого болсон байна” гээд хэвтүүлсэн. Гурав хоног хэвтээд гарсан. Тухайн үед надад авч ирсэн тахиаг нь Мэргэжлийн хяналтын байгууллагад өгч шалгуулахаар сэрүүн нөхцөлд хадгалж байгаа. Цагаан сар болж байсан учраас олон хоногийн амралт таараад, шинжилгээнд өгч амжаагүй байсан юм. Гэтэл саяхнаас, манайхныг хордлогод орсны дараа маш олон хүн мөн адил Зайсан дахь салбараар үйлчлүүлээд хордсон юм байна. Тэгэхээр хордлого хэдэн өдрийн өмнөөс биш бүр хоёрдугаар сарын эхээр эхэлсэн гэж бодож байна. Өмнө нь Зайсангийн “KFC”-гээр үйлчлүүлээд хордлогод орсон гэсэн зүйл хэд хэдэн удаа сонсч байсан ч үнэхээр ийм зүйл болно гэж бодоогүй.
Эх сурвалж: Zindaa.mn
Сэтгэгдэл бичих