АНУ, Украины талууд удаан хэлэлцсэний эцэст энэ долоо хоногт ашигт малтмалын гэрээгээ байгуулсан билээ. Энэхүү гэрээг байгуулснаар Трампийн засаг захиргаа Украинд дахин зэвсэг нийлүүлж эхлэх юм. Тэгвэл АНУ-ын Төрийн департмент Украинд 50 сая ам.долларын батлан хамгаалахын дэмжлэг үзүүлэх зөвшөөрлийг баталгаажуулжээ. Энэ нь Трампийн бүрэн эрхийн хугацаа эхэлснээс хойших анхны тусламж болж байна.
Энэ талаар Зеленский цахим хуудсандаа Бид Ватикан дахь уулзалтынхаа анхны үр дүнг гаргалаа. Үнэхээр түүхэн үйл явдал болсон. Уулзалтын бусад үр дүнг бид хүлээж байна. Хэлэлцээр үнэхээр тэгш эрхтэй болсон. Украинд их хэмжээний хөрөнгө оруулалт хийх боломж энэ хэлэлцээрээр бүрдсэн гэжээ.
Ашигт малтмалын гэрээнд АНУ-ын Сангийн сайд Скотт Бессент, Украины Тэргүүн шадар сайд Юлия Свириденко нар Лхагва гаригт гарын үсэг зуржээ. Одоо Украины парламент хэлэлцээрийг батлах ёстой.
Украинд цэргийн болон хүмүүнлэгийн тусламж болгон илгээж байсан мөнгийг буцааж авна гэж Трамп удаа дараа хэлсэн билээ. Тэгвэл энэ мөнгийг гэрээнд тусгаагүй нь хамгийн гол юм.
АНУ, Украины хэлэлцээрт ОХУ төдийлөн хүчтэй хариу үйлдэл үзүүлээгүй байна. Гагцхүү ерөнхийлөгч асан Дмитрий Медведев л цахим хуудсандаа Энэ хэлэлцээр бол Зеленскийн хувьд сүйрэл. Трамп Киевийн дэглэмийг нурааж, АНУ-ын тусламжийг ашигт малтмалын нөөцөөр төлөх хэмжээнд хүргэлээ. Украинчууд одоо устаж үгүй болж буй улсынхаа баялгаар цэргийн тусламжийн төлбөрийг төлөх болно гэжээ.
Discussion about this post