Ипотекийн зээл нь иргэдийг орон сууцжуулах нэрийн дор барилгын компаниудын халаасыг зузаатгасаар ирсэн. Сайд Л.Энх-Амгалан ипотекийн зээл олголтын нөхцөлийн талаар 04 сарын 20-ноос өмнө нийтэд мэдээлнэ гэсэн. Өмнө нь 400-500 тэрбум төгрөгийн санхүүжилттэй явж ирсэн хөтөлбөр дахин 500 тэрбумаар нэмэгдэж, нэг их наяд төгрөгт хүрэх сураг дуулдаж байна. Гэвч энэ мөнгө яг хэнд зориулагдах бол.
Албаныхны мэдээлснээр, хөтөлбөрийн ихэнхийг орон сууц анх удаа авч буй гэр бүлд зориулах гэнэ. Сайхан сонсогдох хэдий ч ийм амлалтаар барилгын үнийг хөөсрүүлж, иргэдийг илүү их өрөнд унагачих вий гэсэн хардлага нийгэмд үүсэж байна.
Өмнө нь ипотекийн зээлийн хүүг бууруулсан ч иргэдийн төлөлт буураагүй. Жишээлбэл ипотекийн зээл найман хувийн хүүтэй байхад зээл авсан иргэд сард 400-600 мянган төгрөг төлдөг байсан. Зургаан хувь болгож бууруулахаар уг нь төлөлт багасах ёстой. Гэтэл метр квадратын үнэ нэмэгдэж, иргэдийн зээлийн сарын төлөлт дээр 100-150 мянган төгрөг нэмэгдсэн. Энэ бол бодит жишээ. Товчхондоо иргэд хохирч, барилгын компаниуд хожсон гэсэн үг. Тиймээс барилгын компаниудад зориулсан ипотек хийж болохгүй.
Нийлүүлэлттэй уялдаагүй ипотекийн хөтөлбөр бол нүдээ аниад замын хажуугаар алхаж буйтай адил. Үүнийг эрх баригчид өөрсдөө ч хүлээн зөвшөөрсөн. Шинэ хөтөлбөр нь орлого, төлбөр хоёрыг уялдуулсан байх ёстой. Эмх замбараагүй санхүүжилтээс болж барилгын метр квадратын үнэ өсөхөд хүрвэл зөвхөн иргэд биш улсын төсөв хохирох нь гарцаагүй юм.
Чанцалын Бэлгүүтээ
Сэтгэгдэл бичих