УИХ ХАЛДАШГҮЙ БАЙДЛЫН ДЭД ХОРОО ХУУЛЬ ЗӨРЧИЖ, Ц.САНДАГ-ОЧИРЫГ ДАРГААР

Улсын Их Хурлын Төрийн байгуулалтын байнгын хорооны 2024 оны арваннэгдүгээр сарын 27-ны хуралдаанаар Улсын Их Хурлын гишүүний халдашгүй байдлын дэд хорооны даргыг сонгох тухай асуудлыг хэлэлцжээ. Хуралдаан даргалагч тус дэд хорооны даргад УИХ-ын гишүүн Ц.Сандаг-Очирын нэрийг дэвшүүлж байгааг танилцуулсан бөгөөд нэр дэвшигчээс асуулт асууж, санал хэлэх гишүүн гараагүй байна.

Эцэст нь санал хураалт явуулахад хуралдаанд оролцсон гишүүдийн 85.7 хувь нь УИХ-ын гишүүн Ц.Сандаг-Очирыг Улсын Их Хурлын гишүүний Халдашгүй байдлын дэд хорооны даргаар сонгохыг дэмжин Байнгын хорооны тогтоолын төслийг баталлаа. Халдашгүй байдлын дэд хороог УИХ-д хамгийн олон сонгогдсон есөн гишүүнээр бүрдүүлдэг бөгөөд хамгийн олон сонгогдсон гишүүнийг даргаар томилуулан ажилладаг. Гэвч энэ удаад Байнгын хороо дэгээ зөрчиж, даргаа сонголоо. УИХ-ын тухай хуулийн тухай хуульд УИХ-ын гишүүний Халдашгүй байдлын дэд хорооны бүрэлдэхүүнийг томилох талаар тодорхой заасан байдаг.

Тодруулбал,

27.7.Улсын Их Хурлын гишүүний халдашгүй байдлын дэд хороодоос бусад дэд хорооны бүрэлдэхүүнд зөвхөн харьяалах Байнгын хорооны гишүүд орох бөгөөд дэд хорооны бүрэлдэхүүн нь тухайн Байнгын хорооны гишүүдийн хоёрны нэгээс илүүгүй байна.

27.8.Улсын Их Хурлын гишүүний халдашгүй байдлын дэд хороо Улсын Их Хуралд хамгийн олон удаа сонгогдсон есөн гишүүнээс бүрдэх бөгөөд бүрэлдэхүүнд цөөнхийн төлөөллөөс оруулна. Гишүүдийн сонгогдсон тоо адил байгаа тохиолдолд тэдгээрийн харьяалагдах нам, эвслийн бүлгийн саналыг баримтална гэж заасан байдаг. Тэгвэл УИХ-ын гишүүн Халдашгүй байдлын дэд хороонд УИХ-ын гишүүн Ц.Сандаг-Очир багтах боломжгүй юм байна.

Эх сурвалж: ergelt.mn