Үндэсний эвслийн тэргүүн Н.Номтойбаяр өнөөдөр /2024.06.24/ цаг үеийн асуудлаар мэдээлэл хийлээ.
Тэрбээр “Үндэсний эвслээс Хангайн бүсийн дөрөвдүгээр тойрогт Д.Ганболд, Э.Саранцэцэг, Б.Чинзориг нар нэр дэвшиж буй. Орхон аймгийнхан хэнийг сонгож, хэнтэй цаашдын дөрвөн жилд хамтран ажиллах вэ гэдгээ анхаарч, хамтран шийдье. Үндэсний эвсэл энэ тойрогт хоосон үлдээсэн таван сонголт дээр хэнийг дэмжих вэ гэдэг нь маш чухал. Эрдэнэт хотын уугуул УИХ-ын гишүүн Д.Батлуттай сүүлийн 15 жил хамтран ажиллаж байгаа. Нутгийнхны хандлага хэн дээр байгааг нь харахаар яах аргагүй УИХ-ын гишүүн Д.Батлут байгаа. Хангайн бүсэд нутаг нутгийнхаа гаралтай УИХ-ын гишүүдийг илүү дэмжих хандлагатай байна. Жишээлбэл, Хөвсгөлд Боловсрол, шинжлэх ухааны сайд Л.Энх-Амгаланг түлхүү дэмжиж байна. Өнөөдөр Эрдэнэт хотод ажиллаж байна. Нэг сэтгэл гонсоймоор асуудал байна. Х.Баттулга гэж нөхөр өнгөрсөн хугацаанд төр ажиллаж байхдаа Монголд учруулсан балгийг хэзээ ч мартаж болохгүй. Яагаад тэр нөхөр энэ тойрогт нэр дэвшиж байгааг эрдэнэтчүүд асуухгүй байна вэ. Би бол маш сайн мэднэ. Монголын төрд төрийн өндөр албан тушаал хашиж байхдаа Монголыг элгээр нь хэвтүүлж, Монгол хожоогүй. Зөвхөн ОХУ хожиж ирсэн.
Энэ хүний дотоод сэтгэл зүрхэнд Монголд байдаг гэдэгт асар их эргэлздэг. Хийсэн болгоных нь гор, үйлийн үрийг яриад барахгүй. Хэдэн арван тэрбумаар Сайншандын аж үйлдвэрийн парк барина гээд нохойн замаар оруулав.
Төмөр зам барина гээд хэдэн зуун тэрбум төгрөгийг нохойн замаар орууллаа. Энэ нөхөр “Эрдэнэт” үйлдвэртэй холбоотой асуудлаар энэ тойрогт нэр дэвшиж байна. Хоёрт, Эгийн голын усан цахилгаан станцыг гацаах зорилготой гэж харж байна. Тэр өнгөрсөн хугацаанд төр засгийн удирдлагуудтай ярьж байгаа нь Эгийн голын усан цахилгаан станц. Сайншандын аж үйлдвэрийн паркийг барина гэж байгаад хулгай хийгээд дууссан. Тойрон хүрээлэгчид нь гадаад руу зугтааж, ял авах нь ялаа авсан. Хэдэн зуун тэрбум төгрөгийг зарцуулсан бэ. Өнөөдрийн төрийн тэргүүн Эгийн голын усан цахилгаан станцыг барьж, ашиглалтад оруулахаар эрчимтэй үйл ажиллагаа явуулж байгаа. Х.Баттулга энэ төслийг л зогсоох зорилготой. Энэ нь ОХУ-д л ашигтай. Ердөө л тэр. Тэгэхээр Эрдэнэтчүүд эх оронч сонголт хийхийг хүсч байна” гэв.
Сэтгэгдэл бичих