Улаанбаатар, 2024 оны зургаадугаар сарын 19 /МОНЦАМЭ/. Хөвсгөл аймгийн ихэнх сумын нутгаар гандуу, бэлчээрийн ургамал муу ургаж байгаа тул “Мөрөн бороо экспедиц” цаг агаарт зориудаар нөлөөлж, бороо оруулахаар үүл буудаж эхэллээ.
Тодруулбал, тус аймгийн Мөрөн сумаас 10 гаруй км зайд үүлэнд хур тунадас нэмэхээр 3 пуужин тавьжээ. Үүлний дуслын тоо, хэмжээ ихэссэнээр ойрын 50 км зайд байрладаг Мөрөн, Төмөрбулаг, Бүрэнтогтох сумын нутгаар бороо хур нэмэгдэх юм.
Хуурайшилт их, борооны үүлийг доороос, хөрснөөс дэмжих нь муу байгаа тул цаг агаарт зориудаар нөлөөлөх шаардлагатай байгаа аж. Хөвсгөлөөс гадна Ховд, Завхан болон говийн аймгуудад мөн үүл буудахыг ЦУОГШ мэдээлжээ.
Сэтгэгдэл бичих