Нүүрсний хулгайтай холбоотой асуудлыг ил болгохыг шаардсан иргэд 12 дугаар сарын 4-нөөс хойш төв талбайд жагсаал хийж буй. Хүйтний эрч чангарч, цас хялмаарсан ч иргэд жагсаалаа зогсоохгүй, үргэлжлүүлсээр тул жагсагчдад гэр барих зөвшөөрөл олгох шаардлагатайг олон нийт уриалаад буй.
Тиймээс талбай дээр жагсаал, цуглаан зохион байгуулж байгаа иргэдэд гэр барих зөвшөөрөл НЗДТГ-аас олгожээ.
Энэ талаар НЗДТГ-ын дарга И.Баатархүү мэдээлэл өглөө. Тэрбээр “Жагсаал, цуглаан хийх журмын тухай хуулийн 11.3.8-д Нийслэл Улаанбаатар хотын Сүхбаатарын талбайд жагсаал, цуглаан зохион байгуулахдаа гэр, майхан, бусад түр орогнох байр барих болон хоноглохгүй байх, түүнчлэн бүх төрлийн тээврийн хэрэгсэл, ердийн хөсөг нэвтрүүлэхгүй байхаар заасан. Иймд Сүхбаатарын талбайд үл хамаарах хэсэг буюу талбайн урд хэсгийн автомашины зогсоолд хоёроос илүүгүй гэр барих зөвшөөрөл олгож байгааг мэдэгдэж байна” хэмээв.
Сэтгэгдэл бичих