Гадаад хэл суралцагчдад туслах зориулалттай Duolingo аппликэйшн жил бүр дэлхийн улс орнуудын иргэд ямар гадаад хэлийг хамгийн их сонирхон судалж байгаа тухай тайлан гаргадаг.
Duolingo бол дэлхийн хамгийн өндөр хэрэглээтэй боловсролын аппликэйшн бөгөөд нийт 40 хэлийг сургах 100 гаруй хөтөлбөрийг багтаасан байдаг юм.
Тус аппликэйшнээс гаргасан 2021 оны тайланд Монгол улсын Duolingo хэрэглэгчид Солонгос хэлийг хамгийн их судалдаг тухай мэдээлжээ.
Харин монголчуудын хамгийн их суралцдаг хоёр дахь гадаад хэл нь Англи хэл юм байна.
Дэлхийн улс орнуудаас хоёр улс л Солонгос хэлийг хамгийн их судалдгийн нөгөө нь Бутан улс болжээ.
Үүнээс гадна Бразил, Франц, Герман, Энэтхэг, Мексик зэрэг улсуудын иргэдийн дунд Солонгос хэлийг сонирхон судлах явдал нэмэгдсэн нь энэ хэлийг дэлхийн долоо дахь өндөр эрэлттэй хэл болгосныг мэдээлсэн байна.
Дэлхийн улс орнуудын иргэдийн хамгийн их суралцаж буй топ 10 гадаад хэл Англи, Испани, Франц, Герман, Япон, Итали, Солонгос, Ирланд, Свахили, Швед болжээ.
Харин хамгийн их судлагдаж буй хоёр дахь гадаад хэлнүүдэд Франц, Испани, Герман, Англи, Япон, Солонгос, Орос, Турк, Хятад, Португал, Итали, Дани, Фин, Гуарани, Хинди, Норвег хэлнүүд багтсан байна.
Duolingo дээрх судалгааг гаргахдаа 2020 оны аравдугаар сарын 1-нээс 2021 оны есдүгээр сарын 30-ны хооронд хүмүүсийн судалсан гадаад хэлний статистик мэдээлэл дээр үндэслэсэн ажээ.
Мөн суралцагчдын хувийн мэдээллийг нууцлах үүднээс 5,000-аас цөөн хэрэглэгчтэй улс орнуудыг тайландаа оруулаагүй байна.
Эх сурвалж: Duolingo
Сэтгэгдэл бичих