Францын Страсбург хотноо өчигдөр /2018.12.11/ орой 20.00 цагийн үед буутай этгээд халдлага үйлдэж, хоёр хүний аминд хүрч, 12 хүнийг гэмтээсэн байна.
Хэргийг шалгаж буй прокурорууд тус хэргийг “террорист үйл ажиллагаа” хэмээн дүгнэжээ.
Халдлагын улмаас дөрвөн хүн нас барсан бол дөрвөн хүн хүнд, зургаан хүн хөнгөн бэртэл авсан байна. “Буун дуу гарч, арваад минутын турш хүмүүс яахаа мэдэхгүй ийш тийш гүйлдэж байсан” хэмээн хэргийн газар байсан иргэн ярьжээ.
Халдлага үйлдсэн этгээд нь Францад хамгийн томд тооцогдох зул сарын худалдаа явуулж байсан захын ойролцоо гал нээгээд, хэргийн газраас зугтсан байна. Цагдаа нар камерын бичлэг шүүж, царайг таниад, хувийн мэдээлэл болоод гэрийн хаягийг нь олж авчээ. Хэрэгтний гэр нь зул сарын худалдаа явуулж байсан захаас дөрвөн километрийн зайтай газар байдаг аж. Түүнийг цагдаа нар эрэн сурвалжилж байгаа юм.
Цагдаа нарын мэдээлснээр халдлага үйлдсэн этгээд нь Страсбург хотод төрж өссөн, 29 настай эрэгтэй бөгөөд өмнө нь террорист халдлага үйлдэхийг завдсан хэргээр шалгагдаж байв. Тэрбээр халдлага үйлдэх үедээ буутай байснаас гадна мөрдлөгийн явцад цагдаа нар гэрээс нь их хэмжээний тэсрэх бөмбөгийг илрүүлжээ.
Нас барсан хүмүүст Францын Ерөнхийлөгч Эммануэль Макрон эмгэнэл илэрхийлж, Страсбург хотын дарга Роллог Рий хотын захиргааны байшингийн урд байх төрийн далбааг хагас бөхийлгөж, нас барсан хүмүүст хүндэтгэл үзүүлнэ гэв.
Эх сурвалж: ВВС
Сэтгэгдэл бичих