УИХ-ын чуулганы өнөөдрийн /2018.11.29/ нэгдсэн хуралдаан түр завсарлаад байна. Учир нь, УИХ-ын дарга М.Энхболд Жижиг, дунд үйлдвэрийг хөгжүүлэх сангаас зээл авсан хэрэгт нэр холбогдсон нэр бүхий гишүүдийн асуудлыг Ёс зүйн дэд хороогоор хэлэлцэх шаардлагатай хэмээн үзэж, хуралдааныг түр завсарлуулсан юм. Үүнтэй холбогдуулан УИХ-ын Ёс зүйн дэд хорооны дарга, УИХ-ын гишүүн С.Бямбацогтоос дараах зүйлийг тодрууллаа.
-Ёс зүйн дэд хороо хуралдах гэж байна. Ирц бүрдэх болов уу?
-Ирц хүрэх байх гэж найдаж байна.
-Ёс зүйн хорооны хурлаар зээл авсан хэрэгт холбогдсон сайд, гишүүдийн асуудлыг хэлэлцэж ямар шийдвэрт хүрэх вэ?
-Зээлтэй холбоотой асуудлаар Ёс зүйн дэд хороонд иргэд, аж ахуйн нэгж байгууллагаас нэр бүхий гишүүдийн асуудлаар тодорхой шаардлага ирүүлсэн. Ёс зүйн дэд хорооны дүрмийн дагуу хууль хяналтын шалгаж байгаа хэргийг Ёс зүйн дэд хороо давхар шалгахгүй гэж заасан байдаг. Үүний дагуу Улсын Ерөнхий прокурорт хандаж холбогдох бичгийг авсан. Энэ бичгээ хэлэлцэх шаардлага байна. Мөн төрийн бус байгууллагаас зээлийн асуудалтай холбогдсон нэр бүхий гишүүд, сайд нарыг чуулган, байнгын хороодод оруулахгүй байх ёстой, санал хураалтад оролцуулахгүй гэж үзэж байгаа. Тиймээс үүнийг Ёс зүйн дэд хороогоор хэлэлцэж нэг талд нь шийдээд чуулганаа хуралдуулах гэж байна.
-Ёс зүйн алдаа гаргасан гэж үзвэл ямар хариуцлага тооцох вэ?
-УИХ-ын гишүүний Ёс зүйн дүрэмд хариуцлагын санкцууд байдаг. Үүнд заасан арга хэмжээний дагуу хариуцлага тооцно. Гэхдээ өнөөдрийн хуралдаанаар ямар нэгэн дүгнэлт гаргахгүй, ёс зүйн арга хэмжээ авахгүй. Энэ хурлаар ашиг сонирхлын зөрчил байна уу, ямар байдлаар шийдэх вэ гэдэгт л хариулт өгнө.
-Ёс зүйн дэд хороогоор дээрх асуудлуудыг авч хэлэлцээд ямар нэгэн дүгнэлт гаргахгүй юм байна. Тэгэхээр хуралдах шаардлага байгаа юм уу?
-Дүгнэлт гарахгүй. Гэхдээ миний бодлоор Ёс зүйн дэд хорооноос Ашиг сонирхлын зөрчлийн хууль зөрчсөн тохиолдолд мэдэгдэх үүрэгтэй. Хэрхэн яаж шийдвэрлэхээ одоо ярилцана. Зөрчил үүссэн гэж үзвэл тухайн гишүүн чуулганы хуралдаанд оролцохгүй байх эрхтэй. УИХ-ын дэгийн тухай хуульд мөн энэ талаар заасан байгаа.
-Хууль хяналтын байгууллагаар эцэслэн тогтоогоогүй байхад чуулганы хуралдаанд оролцуулахгүй гэж буй нь ямар учиртай вэ?
-Оролцуулахгүй гэж байгаа юм биш. УИХ-ын гишүүний бүрэн эрх. Ашиг сонирхлын зөрчил үүссэн тохиолдолд хуулийн дагуу мэдэгдэх үүрэгтэй. Үүнийхээ дараа оролцохгүй байгаа нь өөрийнх нь бүрэн эрх.
Сэтгэгдэл бичих