УИХ-ын Эдийн засгийн байнгын хорооны ээлжит хуралдаан дөнгөж сая өндөрлөлөө. Энэ удаагийн байнгын хорооны хуралдаанаар Засгийн газраас энэ сарын 17-нд өргөн мэдүүлсэн Монгол Улсын Засгийн газар, Бүгд найрамдах Беларусь улсын Засгийн газар хооронд байгуулах “Экспортын зээлийн ерөнхий хэлэлцээр”-ийн төслийг хэлэлцсэн ч гишүүд картаа сугалж гарсан тул түр хойшлууллаа.
Учир нь, 19 гишүүний бүрэлдэхүүнтэй байнгын хорооны ирц бүрдсэн ч хуралдаандаа хоёрхон гишүүн л суужээ. Тодруулбал, УИХ-ын гишүүн Ж.Бат-Эрдэнэ, Б.Баттөмөр нараас бусад нь байнгын хорооны хуралдаандаа суугаагүй юм. Хамгийн сүүлд, УИХ-ын гишүүн Д.Тэрбишдагва “Байнгын хорооны хуралдаанд гуравхан гишүүн сууна гэж байхгүй. Байнгын хорооны дарга ирцээ бүрдүүл” хэмээн хэлээд картаа сугалж, танхимаас гарч явсан байна.
Хуралдаанд хоёрхон гишүүн сууж, Монгол Улсын Засгийн газар, Бүгд найрамдах Беларусь улсын Засгийн газар хооронд байгуулах “Экспортын зээлийн ерөнхий хэлэлцээр”-ийн төслийг хэлэлцсэн тул байнгын хорооны дарга Д.Дамба-Очир “Засгийн газрын асуудлыг хэлэлцэж байгаа болохоор гишүүд хуралдаандаа суусангүй. Байнгын хорооны гишүүд байхгүй, хоёрхон гишүүн байна. Ирцээ бүрдүүл гэдэг асуудлын хөндлөө. Тиймээс хэлэлцэж байгаа асуудлаа ирэх долоо хоног хүртэл хойшлууллаа” гэж хэлээд байнгын хорооны хуралдааныг өндөрлүүллээ.
Сэтгэгдэл бичих