Гуравдугаар сарын эхний долоо хоногт Үндэсний бөхийн нэгэн сонирхолтой барилдаан болох гэж байгаа. Тодруулбал, Хэнтий аймгийн Өмнөдэлгэр сумын харьяат, улсын аварга Э.Оюунболд, Архангай аймгийн Цэнхэр сумын харьяат, улсын заан М.Бадарч, Ховд аймгийн Буянт сумын харьяат, улсын харцага О.Хангай, Дорнод аймгийн Дашбалбар сумын харьяат улсын харцага Д.Анар нар барилдана. 15 сая төгрөгийн бооцоотой уг барилдааныг “Малчин” ТВ шууд дамжуулан үзүүлэх аж. Тус барилдааны талаар “Малчин” телевизийн захирал С.Жаргал “Бооцоот барилдааныг ирэх гуравдугаар сарын эхний долоо хоногт зохион байгуулна. Анх Э.Оюунболд аварга, М.Бадарч заан хоёрын дунд халз барилдаан хийе гэж ярьсан юм л даа. Энэ талаараа тухайгаа интернэтээр мэдээлсэн. Гэтэл харцага О.Хангай, Д.Анар нар барилдах санал тавьсан юм” хэмээн олон нийтэд мэдээлэл өгсөн байдаг.
Уг бооцоот барилдааны талаар Хэнтий аймгийн Өмнөдэлгэр сумын харьяат, улсын аварга Э.Оюунболд хэвлэлд ярилцлага өгчээ. Тодруулбал, “Надад “Ийм халз барилдаан зохион байгуулах гэж байна. Чи барилдах уу” гэсэн санал тавихаар нь барилдъя л гэсэн. Уг нь анх М.Бадарч заан бид хоёр барилдах ёстой байсан юм. Харин дараа нь харцага Д.Анар, О.Хангай хоёр саналаараа орж ирсэн юм шиг байна лээ. Намайг сайлсан, муулсан бүхэн хэзээ нэг өдөр бурхны шүүлтэд орох байх аа гэж боддог юм. Харин надад бол тэр хүмүүсийн намайг сайлж, муулж байгаа нь хамаагүй. Үндэсний бөх бол миний амьдрал. Өөрийн явж буй замаа дуустал нь үзэж, туулна.
Би үндэсний бөхөд 14 настайгаасаа л амьдралаа зориулж байна. Түүнээс хойш өнөөг хүртэл тасралтгүй бэлтгэл сургуулилалт хийж, үндэсний бөхийн спортод хамаг амьдралаа зориулсан. Амьдрал минь бөхтэй салшгүй холбоотой. Намайг ухаан ороход аав минь барилдаж л байсан. Түүнээс хойш аавыгаа залгамжлаад би ч барилдаж байна. Энэ том өв соёлоо авч үлдэж, үндэсний бөхөөрөө цаашид хүрч чадах хүртлээ л явна” гэжээ.
Сэтгэгдэл бичих